TIRANË– Detaje të reja kanë dalë në dritë nga vdekja e 30-vjeçares në maternitetin “Koço Glozheni” në Tiranë katër ditë pasi solli në jetë foshnjën e saj. Familjarët e të ndjerës akuzojnë stafin mjekësor. Sipas hallës së viktimës, 30-vjeçarja ka pasur dhimbje të forta që në momentin që i ka dalë gjilpëra që i kanë bërë pas lindjes. Prononcimi e dha për Panorama Tv.
Halla e viktimës: Nuk ju është bërë shërbim. Ka shkuar në spital në 3 të natës dhe ka lindur në 3 pasdite. Nuk ka pasur asnjë shqetësim më përpara. Ka pasur dhimbje brinjësh dhe këmbësh. Faji është i doktorit, i ka bërë gjilpërë shumë. Ta fusnin në sallë te operimit nëse nuk kanë pasur mundësi me bërë lindje. Mjekët duan lekë. Kishte dhimbje këmbësh na tha se po më del efekti i gjilpërës. Dhe kishte dhimbje të forta, njërën këmbë nuk e ndiente.
Ngjarja e rëndë tronditi mbarë opinionin publik duke qenë se vjen pas një tjetër ngjarje po kaq të rëndë ku një 34-vjeçare humbi jetën në maternitetin e Elbasanit pak orë pasi kishte kryer një abort.
