SPANJË– Familjarët e Saimir Sulës, të riut shqiptar që ndërroi jetë në rrethana të mistershme në spitalin del Mar të Barcelonës dhe u kthye në atdhe pa zemrën, kanë protestuar sot para Gjykatës së Lartë të Barcelonës duke kërkuar hetim për rastin. Kjo vjen pasi disa protestave në Tiranë para kryeministrisë ku i kanë kërkuar ministrit të Drejtësisë që të dërgojë një letërporosi në organet e drejtësisë spanjolle për të rinisur hetime.
Motra e të ndjerit është shprehur se Gjyqtarja nuk ka pranuar të bëjë analizën e ADN-së për të zbuluar nëse zemra i përket vëllait të saj. Ajo i kërkoi Gjykatës së Barcelonës të vijojë procedurat dhe t’i përgjigjet letërporosisë së shtetit shqiptar. Letërporosija e fundit është e datës 14 dhjetor. Familjarët janë shprehur se nisur nga mosveprimi i kanaleve administrative dhe gjyqësore në Spanjë, prokuroria shqiptare është e detyruar të kërkojë ndërhyrjen e ambasadës spanjolle në Tiranë.
“Gjyqtarja nuk pranon të bëjë analizën e ADN-së që tregon nëse kjo zemër është apo jo e vëllait tim. Kemi dy vite që kërkojmë analizën e ADN-së të këtij organi, që teorikisht i përket Saimirit. Kam ftuar Pedro Sánchezin të flasë si i afërm i Saimir Sulës, ata më përgjigjen duke thënë se nuk do të më thërrasin të flas sepse nuk është qeveria që merret me këtë, që nëse gjyqtari vendos të mos vazhdojë, presidenti. nuk mund të bëjë asgjë”, tha e motra.
Familjarët gjithashtu tregojnë se pas një viti, kanë denoncuar rastin për trafik organesh, por institucionet iu përgjigjën duke i thënë se zemra është në një institut mjekësor në Barcelonë.
