Kryetari i Bashkisë së Tiranës, Erion Veliaj, deklaroi sot në emisionin “Opinion” se hapësira e Tiranës së madhe pas reformës administrative të vitit 2015 wshtw shumw herw mw e madhe se Tirana e vjetwr. Veliaj tha se shumica e kandidatëve kundërshtarë nuk e dinë që po garojnë në këtë territor të madh.
“Sot kemi shumë raste që edhe kur flasim për pemët, edhe kur flasim për ujin në fakt kemi zbuluar edhe nga opozita, i referohen Tiranës së vjetër. Për një pjesë të opozitës ka 8 vite që nuk kanë kuptuar që Tirana në fakt nuk është kjo, por Tirana që nga 2015 me reformën Fino-Çuçi është Tirana kjo me të kuqe. Pra deri në kohën e PD dhe të Lulit është 2015, ndërsa kjo pjesa tjetër është pas reformës administrative.
Dua të ilustroj disa gjëra. Së pari, kjo Tirana këtu është 42 kilometra katrorë. Kjo Tirana e madhe është 1250 kilometra katrorë. Këtë nuk e vë në dyshim që e dinë gazetarët, por ajo që kemi parë nga kjo fushatë dhe kur bëni ftesa për debate, shumica e kandidatëve nuk e dinë që po garojnë për këtë gjënë e madhe, nuk po garojnë për këtë gjënë e vogël”, tha Veliaj.
Sipas kryebashkiakut socialist, 1 milionë pemët e mbjella janë në të gjithë këtë hapësirë të Tiranës. “Që do të thotë që kur flasim për 1 milionë pemët janë në të gjithë këtë Tiranën e madhe. Domethënë janë edhe në Vaqarr, janë edhe në Pezë te liqeni i Fjollës”, u shpreh ai.
Veliaj tha se pemët janë mbjellë me procesverbal dhe me fatura.
“Patjetër, kemi një koleksion faturash, kemi të gjitha bankat që janë paguar. Të gjitha kompanitë private. Tani kur po të flas për donatorë, ai donatori nuk ka nevojë të falsifikojë. Kur Ardit Gjebrea mbolli 50 pemë e bëri publikisht, e bëri me faturë dedikuar nënës së vet. Kur miqtë e Uejda el Sayed erdhën dhe e mbollën pemën e kuqe dhe e fotografuan, pra ka disa raste kur njerëzit mbjellin për sebep, ka raste kur dikush fondin që ka për përgjegjshmëri sociale për bankën, kompanisë së sigurimit të ambasadave…”, u shpreh Veliaj.
Veliaj: 7 lotet e unazës të përfunduara deri në fund të 2024, opozita bllokoi Astirin tre vite
Kryetari i Bashkisë së Tiranës Erion Veliaj, tha në emisionin “Opinion” se 7 lotet e unazës së Tiranës do të përfundojnë deri në fund të vitit 2024, ndërsa pohoi se vetëm në semaforin e Laprakës koha e pritjes është reduktuar nga 45 minuta në 3-4 minuta.
“Sot jemi duke punuar në 7 akse të tjera të Unazës së Madhe.
Ka mbërritur deri tek rrethrrotullimi i Shkozës, nëse doni të shikoni shumë pemë të mbjella ju ftoj të shkoni nga Materniteti i Ri dhe ta ndiqni këtë rrugëtim. Ajo që jam duke thënë është që po të shikojmë sesi është zgjatur këtu, nga Materniteti i Ri dhe si është rritur vlera e pronës, se ajo që ne harrojmë është, ku ka kaluar unaza, ka kërcyer edhe vlera e pronës.
Sot ata që penguan Astirin 3 vjet me gishta përpjetë, para se të hiqnin një gisht, sot duhet të kërkojnë ndjesë se u bllokua një projekt shumë i rëndësishëm. Tani jemi në një situatë, isha përpara disa ditësh me Belindën, këtu është Kodra e Kokonozëve me Kodrën e Priftit, ky është loti ku punohet tani, është loti tjetër që na çon në një tjetër aks të hyrjes në Tiranë që është “Rruga e Arbrit” dhe prandaj janë mbjellë pemë edhe në Zall-Bastar, se sot në Zall-Bastar shkohet për 30 minuta, ndërkohë që më përpara Zall-Bastari mendohej që ishte fundi i botës.
Sot me “Rrugën e Arbrit”, ti ke akes në malësinë e Tiranës që nuk e kishe më përpara, në Zall-Bastar dhe Zall-Dajt. Këtu jemi në Tufinë, po të shikoni është edhe gjurma e varrezave. Në Tufinë, kalon në anën tjetër, pra tek “5 maji” ose te bregu i lumit, kalon në anën tjetër të Paskuqanit. Sot mund t’ju them që të 7 lotet janë në funksion dhe unë besoj që deri në fund të vitit tjetër i kemi mbaruar të 7 lotet. Kujdes! Duke presupozuar që politika me 2 gishtat përpjetë nuk e bllokon si Astiri”, tha Veliaj.
Veliaj: Ndërtuam Bulevardin e Ri, Sistemimi i Lumit të Tiranës shpëtoi qytetin nga përmbytjet
Kreu i Bashkisë së Tiranës Erion Veliaj deklaroi se ishte kjo administratë e cila bëri Bulevardin e ri dhe Lumin e Tiranës. Ai nënvizoi se Tirana ka 8 vite që nuk përmbytet më.
“Ka disa ndërhyrje në Tiranë. Ndërhyrja e parë që ka ndodhur ka qenë me lumin dhe me bulevardin. Pjesa e “Bulevardit të Ri”, është një kredi e Bashkisë së Tiranës, me Fondin e Abu D’habit.
Sot kemi “Bulevardin e Ri” dhe sot kemi gjithë pjesën e Lumit të Tiranës. Pjesa e Lumit të Tiranës ka mbaruar totalisht, 100%. Pjesa ikonike që është sheshi fundor i “Bulevardit të Ri”, është një tjetër projekt. Po flasim për një lumë i cili deri dje, për ne mund të jetë gallatë, kurse për ata që jetonin tek Njësia 4, 9, 8 dhe 11, përmbytja vinte deri tek “Siri Kodra” lumi se nuk shkarkonte.
Sot kemi një situatë te Lumi i Tiranës, totalisht të transformuar. Ndërkohë ka mbaruar pjesa e Unazës së Madhe dhe ju kujtohet lufta e Bashkisë së Tiranës dhe qeverisë tek pjesa e Astirit. Ndërkohë ajo që shikoni, për lehtësi, këtu shikoni sesi ka mbaruar zgjatimi i Lanës, pra shtylla kurrizore e qytetit është dyfishuar. Një qytet i cili mbaronte te Brryli dhe te Pallati me shigjeta, këtu sapo kemi marrë financimin që zgjatimi i Lanës të shkojë deri në Kashar.
Ky ishte projekti që Ilir Meta, që sot është një nga përfaqësuesit e koalicionit e bllokoi. Po ju flas për presidentin që refuzonte të miratonte kredinë, sepse që të marrësh një kredi nga BERZH-i, të duhet plotfuqishmëria dhe sot njerëzit që kanë bllokuar sistematikisht Tiranën tek ky Astiri që sot është hapur, te kjo Lana, sot janë alternativa”, deklaroi Veliaj.
