TIRANË– Qeveria ka vendosur këtë të hënë që të pezullojë përkohësisht statusin e investitorit strategjik për resortin e kompanisë Mediterranean Wave që kapte vlerën e 50 milionë eurove në Plazhin e Gjeneralit. Kjo pasi sipas Komitetit të Investimeve Strategjike bie në kundërshtim me Planin e Përgjithshëm Vendor të Kavajës. Në vendim e KIS thuhet se projekti pezullohet derisa kompania ta ndryshojë atë për ta përshtatur me treguesit urbanistik të lejuar për zonën. Kompania që pritet të ndërtojë resortin luksos është në pronësi të biznesmenit Shpërtim Shijaku.
Vendimi për dhënien e statusit të investitorit strategjik iu dha kompanisë në dhjetor të vitit 2021, ndërkohë që kompania me pronar Shpëtim Shijakun dhe administrator Florjan Almadhi u krijua në në fillim të korrikut 2021. Përmes statusit të investistorit strategjik kompania ndërtonte në një hapësirë prej 635 mijë metër katrorë tokë shtetërore në Plazhin e Gjeneralit, ndërkohë që qeveria mori përsipër të ndërtonte të gjithë infrastrukturën e nevojshme.
VENDIMI:
Deri në përmbushjen e detyrimeve nga subjekti investues, efektet juridike të Vendimit “Për miratimin e statusit “Investim/Investitor Strategjik Procedurë e Veçantë” për projektin e investimit “Mediterranean Wave” me subjekt aplikues shoqëria “Mediterranean Wave” sh.p.k. pezullohen,” thuhet në vendimin e marrë në mbledhjen e fundit të Komitetit të Investimeve Strategjike.
Subjekti investues “Mediterranean Wave” sh.p.k. të rishikojë dhe të paraqesë një gjurmë të re të ndërtimit të projektit të investimit strategjik “Mediterranean Wave.” Gjurma e re e rishikuar, nuk duhet të shtrihet jashtë gjurmës së miratuar me Vendimin e vitit 2021 dhe nuk duhet të jetë më e madhe se 10 ha.
Gjurma e re e rishikuar, sipas pikës 1 të këtij vendimi, duhet të paraqitet së bashku me Planin e Gjelbërimit, pranë Agjencisë Shqiptare të Zhvillimit të Investimit, brenda dhe jo më vonë se 30 ditë nga njoftimi i këtij vendimi. Në rast të mosrespektimit të këtij kushti, Komiteti i Investimeve Strategjike ka të drejtë të revokojë Vendimin Nr.11/9 të datës 2.12.2021 për dhënien e statusit strategjik.
Projekti i propozuar nga kompania parashikonte ndërtimin e një kompleksi turistik i përbërë nga hotele dhe vila me një sipërfaqe totale ndërtimi prej rreth 200 mijë metrash katrorë. Por pas verifikimeve në terren, Ministria e Turizmit dhe Mjedisit i ka propozuar Komitetit pezullimin e tij për shkak se projekti bie ndesh me planin urbanistik të zonës.
