TIRANË– Komisioni Qëndror i Zgjedhjeve ka vendosur në mbledhjen e kësaj të hëne që anëtari i tretë i grupeve të numërimit për zgjedhjet lokale të 14 majit i takon Partisë Socialiste. Ndërsa anëtari i katërt i grupit të numërimit të votave do duhet të vendoset me short mes Partisë për Drejtësi Integrim dhe Unitet (PDIU) dhe Partisë së Lirisë (pl). Kryekomisioneri i zgjedhjeve Ilirjan Celibashi pati një “përplasje” me përfaqësuesit e koalicionit “Bashkë Fitojmë” dhe atij të PDIU-së.
Përfaqësuesi i PDIU-së: Ne jemi në opozitë, kemi votuar pro qeverisë për marrëveshjet me amerikanët.
Altin Kaziaj nga Koalicioni BF: Vetëm ne jemi në garë në gjithë Shqipërinë, PDIU jo. Votat e kujt do të mbrojnë numëruesit e saj?
Përfaqësuesi i PDIU: Do mbrojmë votat e Lajla Përnaskës. Po ju në Himarë do numëroni votat e kandidatit që ka marrë gjak shqiptarësh?
Ilirjan Celibashi: Ky merak i juaji nuk është fort i justifikuar. Numëruesit kanë qenë përgjithësisht korrekt. Ne kemi rinumëruar dhe nuk ka pasur abuzime madhor.
