TIRANË- Kreu i Partisë së Lirisë Ilir Meta ka mbledhur këtë të hënë kryesinë, ku mësohet se kjo mbledhje kishte si çështje me prioritet për diskutim, zgjedhjet vendore të 14-majit. Meta në fjalë e tij është shprehur se angazhimi i Partisë së Lirisë është një angazhim i spikatur, vendimtar dhe historik që në 14 maj do të jetë forcë kryesore për fitoren e opozitës, po ashtu ka shtuar më tej me bindje të plotë se PL do triumfojë në fitoren e shumicës së bashkive.
FJALA E PLOTË E KRYETARIT TË PARTISË SË LIRISË, ILIR META NË MBLEDHJEN E KRYESISË:
Përpara se të vazhdojmë me rendin e ditës, e sidomos me përshkallëzimin e organizimit dhe marrjes së masave lidhur me zgjedhjet e 14 majit dhe me ngritjen dhe miratimin e komisionit të vlerësimit për kandidatët për anëtarë të Këshillave Bashkiake për këto zgjedhje. Do të doja të theksoja dhe një herë tjetër rëndësinë e ndërgjegjësimit të të gjithë drejtuesve tanë, të gjithë anëtarëve dhe simpatizantëve për këtë betejë të jashtëzakonshme që po zhvillojmë dhe ta çojmë deri në fund. Deri në triumfin e lirisë dhe të pluralizmit politik përballë kësaj bande që ka kapur të gjitha institucionet e shtetit dhe kërkon të vrasë shpresën dhe besimin tek ardhmja duke shkretuar vendin dhe vatrat e çdo familjeje shqiptare. Besoj se dhe sot e patë sesi u premtua për herë të pestë apo të gjashtë ajo ura që do të bëhet mbi Bunë. Sa herë është takuar me ndonjë autoritet nga Mali i Zi këtë premtim ka bërë por ajo që ishte sjellja më e pacipë dhe tallje, ishte ajo që duhet të paguante më shumë Mali i Zi për Urën mbi Bunë, meqënëse I paska Mali i Zi rrogat më të larta. Sepse ky nuk ka lekë për të bërë ura ky ka lekë vetëm dhe taksa dhe borxhe që merr në emër të shqiptarëve vetëm për të vjedhur për veten e tij dhe bandën e tij.
Prandaj dhe kërkon të shkatërrojë Parlamentin dhe llogaridhënien dhe prandaj do ndëshkohet në mënyrën më shembullore. Ju e dini shumë mirë që pasojë e korrupsionit të tij është fakti që Shqipëria dikur kishte pagat mbi mesataren e rajonit, sot është për faqe të zeze. Dhe prandaj kjo është një nga arsyet e largimit masiv të qytetarëve tanë, si në asnjë vend tjetër të rajonit tonë.
Nëse në vitin 2022, paga mesatare bruto në Maqedoninë e Veriut është 832 euro, në Serbi 836 euro, në Malin e Zi 900 euro dhe në Bosnje Hercegovinë është 936 euro në Shqipëri është 518 euro. Ju e dini gjithashtu shumë mirë se nëse në Shqipëri për një familje është ndihmë ekonomikë 58 euro në muaj, në Kosovë është dhënë 100-120 euro në muaj. Ndërkohë që buxheti i Shqipërisë është dyfishi i atij të Kosovës. Kjo gjë vlen edhe për pensionet, kjo gjë vlen edhe për pagat dhe më mirë se kushdo këtë gjë e dinë edhe pedagogët tanë që vazhdojnë të luftojnë dhe të këmbëngulin që të kenë pas 2 vjetësh nivelin e pagave të pedagogëve të Kosovës. Këtë e dinë shumë mirë studentët tanë që nuk kanë asnjë mbështetje nga kjo qeveri dhe kërkojnë thjesht 100 euro në muaj mbështetje siç marrin prej kohësh studentët e Kosovës për të përballuar rritjen e çmimeve dhe të kostos së jetesës.
Dhe më së fundi, besoj se e patë dhe raportin e sotëm, ku Shqipëria përsa i takon çështjeve të inovacionit është vendi i fundit në rajon patjetër dhe në kontinent por është dhe shumë vende mbrapa Bjellorisë së Lukashenkos. Një vend që ka 15 vite anëtar i NATO-s që duhet të kishte hyrë me kohë në Bashkimin Europian, që kapitalin më të çmuar ka patur dhe ka të rinjtë. Pse? Sepse kjo është sjellja armiqësore e kësaj bande ndaj intelektualëve, ndaj të rinjve, ndaj njerëzve të progresit të cilët kërkon ose t’i largojë nga vendi, ose t’i korruptojë, ose t’i thyejë përmes vështirësive ekonomike dhe sociale.
Ndaj dhe ju ftoj të gjithë juve dhe të gjithë qytetarët shqiptarë që më 3 mars së bashku me Partinë Demokratike dhe të gjithë qytetarët shqiptarë t’i themi fjalën tonë të fortë, në mbrojtje të lirisë dhe pluralizmit politik dhe të japim mesazhin e qartë të shporrjes së kësaj bande sa më parë në mënyrë që shqiptarët të mos lëngojnë më por edhe t’i japin një herë e përgjithmonë fund këtij tranzicioni tejet të lodhshëm dhe rraskapitës ndaj vendit tonë dhe popullit tonë.
Besoj se angazhimi i Partisë së Lirisë është një angazhim i spikatur, vendimtar dhe historik dhe pa asnjë diskutim që në 14 maj do të jetë forcë kryesore për fitoren e opozitës dhe jemi të bindur në fitoren e shumicës së bashkive dhe njëkohësisht jemi të bindur se përfaqësimi i Partisë së Lirisë do të jetë i jashtëzakonshëm dhe do të jetë njëkohësisht dhe garante që këto këshilla do të jënë pikërisht vende ku nuk do të flitet thjesht për qytetarët po ku do të flasin vetë qytetarët dhe ku do të marrin zgjidhje, hallet edhe shqetësimet e tyre.
