LEZHË– Vetingu në Policinë e Shtetit “djeg” drejtorin e Policisë së Lezhës Vehbi Bushati. Mësohet se ai nuk ka pranuar që të plotësojë formularin e dekriminalizimit duke sjellë kështu shkarkimin e tij nga detyra e kryepolicit të Lezhës. Formulari i dekriminalizimit përfshin deklarimin e Pasurisë, deklaratën e Kontrollit të Figurës dhe formularin e Vlerësimit të Aftësive Profesionale. Bushati ka 45 ditë kohë që të apelojë vendimin e marrë ndaj tij. Ai u emërua në krye të Policisë së Lezhës në mars të vitit të kaluar.
VENDIMI i Agjensisë së Mbikqyerjes Policore:
1.Largimin nga pozicionet e përcaktuara në nenin 6 të ligjit 12/2018, i ndryshuar, të subjektit të vlerësimit, z.Vehbi Bushati me detyrë Drejtor i Drejtorisë Vendore të Policisë Lezhë, në Drejtorinë e Përgjithshme të Policisë së Shtetit.
2.Vendimi i arsyetuar me shkrim i njoftohet Subjektit të Vlerësimit dhe Drejtorisë së Përgjithshme të Policisë së Shtetit brenda 15 ditëve nga dita e nesërme e shpalljes së vendimit.
3.Ky vendim publikohet në faqen zyrtare të Agjencisë Mbikëqyrjes Policore, në përputhje me pikën 8, të nenit 56, të Ligjit 12/2018, i ndryshuar.
4. Kundër këtij vendimi lejohet ankim brenda 45 ditëve nga data e njoftimit, në Gjykatën Administrative të Shkallës së Parë Tiranë.
