TIRANË– Një aksident i rëndë është regjistruar ditën e sotme në rrugën “Demokracia” në Tiranë. Një 35-vjeçar i identifikuar me inicilaet G.M ka përplasur një vajzë të mitur 9 vjeçe dhe më pas është larguar nga vendi i ngjarjes. Por arratia nuk ka zgjatur shumë pasi është identifikuar dhe vënë në pranga. E mitura siç shihet edhe në video e publikuar nga policia shembet në tokë dhe rrethohet nga kalimtarët. Ajo është dërguar në spitali ku ndodhet nën kujdesin e bluzave të bardha.
NJOFTIMI I POLICISË:
Tiranë. Aksidentoi një të mitur dhe u largua nga vendi i ngjarjes, Policia Rrugore e Tiranës, identifikon dhe vë në pranga autorin. Specialistët e Qarkullimit Rrugor bënë arrestimin në flagrancë të shtetasit G. M., 35 vjeç, për veprat penale “Shkelja e rregullave të qarkullimit rrugor” dhe “Largimi nga vendi i aksidentit” pasi në rrugën “Demokracia”, ka aksidentuar një të mitur 9-vjeçare, dhe më pas është larguar nga vendi i ngjarjes. 9-vjeçarja ndodhet në spital, jashtë rrezikut për jetën.
Shërbimet e Policisë Rrugore të Tiranës, pas marrjes së njoftimit, menjëherë organizuan punën për identifikimin dhe kapjen e autorit të dyshuar. Pas disa orësh pune intensive hetimore profesionale bënë të mundur identifikimin e targës së motomjetit dhe më pas të drejtuesit të tij. Në cilësinë e provës materiale, u sekuestrua motomjeti. Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale.
