TIRANË– Kryeqyteti është zyrtarisht në festë. Në një ceremoni të organizuar në sheshin ‘Skëndërbej’ kryetari i bashkisë së Tiranës ashtu si çdo vit tjetër ndezi dritat e pemës së Krishtlindjeve dhe Vitit të Ri. Kjo ceremoni vitet e shkuara është mbajtur më datë 6 dhjetor por këtë herë u veprua ndryshe kjo për shkak të bllokimit të rrugëve nesër si pasojë e organizimit të samititit BE- Ballkani Perëndimor që do të mbaheht në Tiranë.
“Kemi pasur një super vit për Tiranën si “Kryeqyteti Evropian i Rinisë”; kemi pasur në këtë shesh edhe Rita Orën e Dua Lipën. Tirana ka pasur finalen e futbollit të UEFA Conference Legue; nesër, pasi të ndezim këto drita, Tirana do t’i thotë mirë se erdhët në Shqipëri të gjithë liderëve të BE-së, që për herë të parë vijnë në Ballkan dhe kanë zgjedhur Tiranën, për të qenë sofra, dera e madhe, shtëpia e madhe që i mikpret të gjithë. Kjo është Tirana jonë, miq! Unë e di që jo çdo gjë është perfekt. Por kur bashkëpunojmë, kur duhemi, kur mbështesim njeri-tjetrin, kur i themi njeri-tjetrit bravo të qoftë, jam krenar për ty, ec përpara, Tirana ecën përpara. Ftesa për të gjithë, pavarësisht bindjeve është: Le ta përdorim këtë dhjetor për solidaritet, për dashuri me njeri tjetrin dhe për të kuptuar që kur ne bashkëpunojmë, nuk ka asgjë që i ndal shqiptarët, kur mblidhen në Tiranë dhe e kthejnë qytetin në qytetin e ëndrrave të tyre”, u shpreh Veliaj.
