DURRËS– Kristjan Prenga, 20 vjeç është arrestuar në flagrancë këtë të premte nga Policia e Durrësit pasi tentoi të grabiste një market nën kërcënimin e armës. Siç mund të shihet dhe në pamjet e shpërndara nga blutë e qytetit bregdetar i riu futet i maskuar në market dhe duke kërcënuar me armë punonjësit tenton të grabisë shumën e parave që ndodhet brenda në arkë. Në cilësinë e provës materiale u sekuestrua arma e zjarrit pistoletë e përdorur nga i riu.
NJOFTIMI I POLICISË:
Plazh, Durrës/Ndërhyrja e menjëhershme e Policisë parandalon kryerjen e një vjedhjeje me armë zjarri, ngjarje e cila mund të sillte pasoja për jetën e disa qytetarëve. Finalizohet operacioni policor i koduar “Alarmi”, sekuestrohet një armë zjarri pistoletë. I maskuar dhe i armatosur, hyri gjatë natës, në një market në shërbim, me qëllim vjedhjen e parave në kasë, arrestohet në flagrancë, brenda marketit, 20-vjeçari. Pas marrjes së njoftimit se rreth orës 21:50 të mbrëmjes së djeshme, një shtetas i maskuar dhe i pajisur me armë zjarri, kishte hyrë në një market në lagjen nr.13, gjatë kohës që ky subjekt ishte në shërbim, për të vjedhur, shërbimet e Stacionit të Policisë Plazh kanë organizuar punën dhe kanë mbërritur menjëherë në vendngjarje. Si rezultat i ndërhyrjes së shpejtë dhe profesionale të Policisë, në kuadër të operacionit policor “Alarmi”, u parandaluan ngjarje që mund të sillnin pasoja për jetën e shtetasve që ishin të pranishëm në këtë subjekt, si dhe u arrestua në flagrancë, brenda marketit, pa kryer ende vjedhjen, autori i këtij rasti, shtetasi K. P., 20 vjeç, banues në lagjen nr. 13, Durrës. Gjithashtu, në cilësinë e provës materiale u sekuestrua arma e zjarrit pistoletë, me të cilën kanosi 20-vjeçari, për të kryer vjedhjen. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
