SARANDË– Një 34-vjeçar i identifikuar me inicialet A.B është arrestuar në flagrancë nga Policia e Sarandës pasi pas kontrollit të bërë në makinën me të cilën lëvizte blutë e qytetit bregdetar gjetën dhe sekuestruan një armë zjarri. Ai tashmë do të përballet me akuzën e armëmbajtjes pa leje ndërkohë e ka “pësuar” dhe shoku i tij që ishte pasagjer në mjet. Ai do të procedohet në gjendje të lirë për akuzën e moskallëzimit të krimit.
NJOFTIMI I POLICISË:
Sarandë/Kontrolle të shtuara për evidentimin dhe goditjen e veprimtarive kriminale. Goditet një rast i armëmbajtjes pa leje.
Qarkullonte me armë zjarri, në automjet, arrestohet në flagrancë drejtuesi i automjetit. Procedohet penalisht pasagjeri, për moskallëzim krimi.
Shërbimet e Komisariatit të Policisë Sarandë, në vijim të kontrolleve të shtuara për evidentimin dhe goditjen e veprimtarive kriminale në të gjitha fushat, bazuar dhe në informacionet e siguruara nga inteligjenca informative, për një shtetas që qarkullonte me armë zjarri në automjet, kanë organizuar punën për lokalizimin e automjetit dhe ndalimin e drejtuesit. Në rrugën e fshatit Gjashtë, shërbimet e Policisë kanë ndaluar automjetin e dyshuar, me drejtues shtetasin A. B. dhe pasagjer shtetasin F. Gj. Gjatë kontrollit në automjet është gjetur një armë zjarri pushkë, e cila u sekuestrua në cilësinë e provës materiale.
Në përfundim të veprimeve u arrestua në flagrancë drejtuesi i automjetit, shtetasi A. B., 34 vjeç, banues në fshatin Gjashtë, për veprën penale “Mbajtja pa leje dhe prodhimi i armëve, armëve shpërthyese dhe i municionit”, si dhe nisi procedimi në gjendje të lirë për shtetasin F. Gj., 34 vjeç, banues në fshatin Gjashtë, për veprën penale “Moskallëzimi i krimit”. Materialet i kaluan Prokurorisë, për veprime të mëtejshme.
