TIRANË– Gëzim Prenga është një 54-vjeçar nga Mirdita, i cili më 15 Mars 2023 u arrestua nga policia në afësi të Vorës. Ai ishte i shpallur në kërkim pasi ndaj tij ka 4 masa sigurie arrest në burg në mungesë për akuzën e mashtrimit me tollonat e naftës. Edhe më parë ka qenë i dënuar po për mashtrim dhe ka kryer dënimin.
Por, familjarët janë ankuar pranë emisionit Stop në Tv Klan dhe pretendojnë se gjatë shoqërimit të tij për në komisariat, disa policë e kanë dhunuar në fytyrë. Vëllai i tij, i cili prenoncohet për këtë rast, thotë se 54-vjeçari ka qepje në pjesën e kokës.
“Më kanë arrestuar vëllain në Komisariatin Lezhë për arsye të një vepre penale se quhet mashtrim. Quhet Gëzim Prenga, është 54 vjeç. Para 1 jave e gjysmë më ka telefonuar dhe më ka thënë që një oficer krimesh i Lezhës po më kërcënon në rrugë private. I kam thënë më jep numrin e telefonit të shkoj ta takoj edhe unë në rrugë private, në qoftë se i ke borxh i përgjigjemi. Në rast të kundërt, ç’lidhje ka oficer krimesh që të marrë e të të kërcënojë ty. Më tha jo. E kanë arrestuar në orën 7 e gjysmë në Vorë. Nuk më ka treguar asnjë lloj arsye se unë kam 25 vjet që jam i ndarë me ta dhe ai ka jetuar në punë të vetë në Mirditë dhe unë jetoj në Tiranë. Unë jam vet i shtati, jam familjar. Ka qenë një herë i dënuar nga drejtësia për një vepër penale mashtrim nga çfarë thonë se unë nuk kam qenë këtu në atë kohë, dhe ka vuajtur dënimin dhe ka dalë jashtë”, thotë vëllai.
Vëllai i tij tregon edhe foto të dhunës së ushtruar ndaj të vëllait nga Policia e Lezhës.
“Të ma rrafin, të ma torturojnë e të ma sakatojnë kështu, kurrën e kurrës nuk e fal, kurrë. Kërkoj ndihmën tuaj. Gjashtë oficerë policie të Lezhës që e kanë torturuar dhe masakruar”, shpjegon ai.
Gazetari i Stop shkoi në Policinë e Vlorës për të kërkuar informacion në lidhje me pretendimet për dhunë, ku dorëzoi një kërkesë me shkrim. Në kthim përgjigje, Policia e Lezhës thotë se 54-vjeçari Gëzim Prenga është dëmtuar vetë gjatë tentativës së policëve për ta arrestuar, pasi ai ka tentuar arratisjen. Policia Lezhë bën të ditur se 54-vjeçari nuk ka pranuar të mjekohet dhe mohon faktin se mbi të nuk është ushtruar dhunë.
Për të gjitha pretendimet, prokurori i çështjes, Ylli Pjetërnikaj, tha për Stop se do të bëhen të gjitha veprimet hetimore për të dalë në një përfundim.
“Për shkak të afatit të shkurtër kohor që organi i Prokurorisë ka rënë në dijeni të këtyre pretendimeve të ngritura nga personi i arrestuar, organi i Prokurorisë i ka trajtuar me seriozitet këto pretendime dhe duke respektuar aspektet proceduriale penale sigurisht do fillohet me marrjen e kallëzimit përkatës penalë nga oficerët e Prokurorisë dhe në vijim mbi bazën e këtyre pretendimeve do kryhen të gjitha verifikimet e duhura sipas Kodit të Procedurës Penale. Dhe në përfundim do përcaktohet nëse këto pretendime qëndrojnë apo janë të provuara për të mbështetur. Përveç aspekteve proceduriale që rregullohen nga ligji për trajtimin e të paraburgosurve apo të shoqëruar në komisariat, organi i Prokurorisë në momentin pas administrimit të kallëzimit përkatës nga i arrestuari, do të bëjë dhe kqyrjen e personit dhe veprimet e tjera proceduriale ndër të cilat dhe akti i ekspertimit mjeko-ligjor. Pra, organi i Prokurorisë është në momentet e para që ka marrë dijeni për këto pretendime të ngritura nga i arrestuari”, u shpreh prokurori Ylli Pjetërnikaj.
Prokurori Ylli Pjetërnikaj sqaron se do të merret kallëzim dhe do të kryhen verifikimet e duhura. Pas kallëzimit, do të bëhet kqyrja e personit dhe akt-ekspertiza mjeko-ligjore./Tv Klan
