SARANDË– Një 54-vjeçar është vënë këtë të hënë në prangat e Policisë së Sarandës pasi akuzohet për shpërndarje të lëndëve narkotike. Sipas Policisë, e cila ka ndarë dhe pamjet nga operacioni i koduar “Parts 12”, 54-vjeçari shpërndante doza kokaine dhe kanabisi në zonë ne plazhit në Ksamil. Bashkë me të është vgnë në pranga dhe një 33-vjeçare, e cila kishte dijeni për aktivitetin kriminal të 54-vjeçarit. Ndërkohë në cilësinë e provës materiale janë sekuestruar 3 peshore elektronike për ndarjen e lëndëve narkotike në doza, 3 celularë, si dhe 13 400 lekë të rinj, 530 euro, 140 dollarë dhe 60 paund që dyshohet se janë përfituar nga veprimtaria kriminale.
NJOFTIMI I POLICISË:
Sarandë/Finalizohet operacioni policor i koduar “Parts 12”, për goditjen e një tjetër rasti të shpërndarjes së lëndëve narkotike, në doza. Shpërndante doza kokaine dhe kanabisi, në zonën e Ksamilit, vihet në pranga 54-vjeçari. Vihet në pranga dhe një 33-vjeçare, për moskallëzim krimi. Sekuestrohen doza kokaine dhe kanabisi, 3 peshore elektronike dhe shuma të konsiderueshme parash të përfituara nga shitja e dozave të lëndëve narkotike. Specialistët për Hetimin e Krimeve të Komisariatit të Policisë Sarandë, në vijim të goditjeve të njëpasnjëshme ndaj veprimtarisë kriminale në fushën e narkotikëve, bazuar dhe në informacionet e siguruara nga inteligjenca policore, kanë organizuar dhe finalizuar operacionin policor të koduar “Parts 12”, për goditjen e një rasti në këtë fushë. Si rezultat i këtij operacioni u arrestuan në flagrancë shtetasit: 54 vjeç, banues në Ksamil, për veprën penale “Prodhimi dhe shitja e narkotikëve”. Gjatë kontrollit fizik dhe kontrollit në banesën e këtij shtetasi, shërbimet e Policisë kanë gjetur dhe sekuestruar 27 doza me lëndë të dyshuara narkotike kokainë dhe kanabis, 3 peshore elektronike për ndarjen e lëndëve narkotike në doza, 3 celularë, si dhe 13 400 lekë të rinj, 530 euro, 140 dollarë dhe 60 paund që dyshohet se janë përfituar nga veprimtaria kriminale; 33 vjeçe, banuese në Ksamil, për veprën penale “Moskallëzimi i krimit”, pasi kishte dijeni për veprimtarinë kriminale që kryente shtetasi, por nuk ka kallëzuar në Polici. Materialet procedurale i kaluan Prokurorisë, për veprime të mëtejshme.
