TIRANË– Prokuroria e Posaçme Kundër Korrupsionit dhe Krimit të Organizuar (SPAK) ka zbarkuar sërish këtë të hënë në ambientet e Bashkisë së Kukësit ku ka marrë në dorëzim serverat e kamerave të sigurisë ku po vëzhgon hyrje-daljet e vajzës që shfaqet në video-skandalin e seksit në zyrën e ish-kryebashkiakut Safet Gjici. Mësohet se agjentët e SPAK se po ashtu kanë sekuestruar dhe dokumente të ndryshme për të parë nëse vajza ka përfituar tendera apo para publike nga Gjici.
Oficerët e Byrosë Kombëtare të Hetimit qëndruan për afro 30 minuta në Bashki dhe pasi morën kontakt me punonjësin e IT-së, bënë sekuestrimin e serverit.SPAK do të mund të përcaktojë kohën e realizimit të videos, ndonëse materiali filmik shënon data 6 qershor ora 16.00. Prokuroria e Posaçme e ka identifikuar gruan, e cila banon bashkë me fëmijën ne moshë të mitur në Durrës, dhe ka urdhëruar që ajo nuk duhet të lërë vendin, pra nuk do të lejohet të udhëtojë, për sa kohë që rrëfimi i saj është kyç për hetimin.
