SARANDË– Një tjetër incident i dhunshëm ka përfshirë Policinë e Shtetit. Këtë herë në Sarandë ku një taksist është shoqëruar me forcë dhe tërhequr zvarrë nga tre efektivë të Patrullës së Përgjithshme. Siç shihet dhe në pamjet e publikuara nga mediat lokale Policia është afruar pranë tasisë që qëndron me dyer të hapura dhe i ka vedosur 30 mijë lekë të vjetra gjobë. Në këtë moment ka dalë drejtuesi i taksisë dhe ka kërkuar që në vend që ti vendoset atij masa administrative Policia duhet të lëvizë mjetet që qëndrojnë në vendqëndrimin e taksive.
Debati verbal mes taksistit dhe njërit prej efektivëve të Policisë ka eskaluar në përdorimin e forcës nga uniformat blu. Me bllokun e gjobave në dorë efektivi kap nga qafa shoferin e taksisë dhe e tërheq zvarrë duke i thënë: “Kush je ti që më ngren zërin mua, futu në mjet“. Në këtë moment kanë ndërhyrë dhe efektivët e tjerë të cilët kanë bërë shoqërimin e taksistit. Ende nuk ka një deklaratë zyrtare nga blutë e Sarandës në lidhje me ngjarjen. Ndërkohë qytetarët shohin të shokuar gjithë ‘skenën” e luajtur para tyre.
