TIRANË– Një 37-vjeçare e identifikuar me inicialet M.K është vënë në prangat e Policisë së Tiranës këtë të mërkurë pasi ka tentuar ti vërë flakën një farmacie në rrugën “Luigj Gurakuqi”. Para Policisë gruaja ka thënë se kishte marrë ilaçe në farmaci dhe sipas saj i kanë shkaktuar probleme shëndetësore.
NJOFTIMI I POLICISË:
Finalizohet nga Komisariati i Policisë Nr. 1, operacioni policor i koduar “Pretend”. Tentoi të digjte një farmaci, identifikohet dhe vihet në pranga 37-vjeçarja. Sekuestrohen një bidon me lëndë djegëse që u gjet në derën e farmacisë dhe një aparat celular. Specialistët për Hetimin e Krimeve të Komisariatit të Policisë Nr. 1, pas njoftimit se ishte tentuar të digjej me lëndë djegëse, një farmaci në rrugën “Luigj Gurakuqi”, kanë organizuar dhe finalizuar operacionin policor të koduar “Pretend”, për zbardhjen e kësaj ngjarjeje. Si rezultat i këtij operacioni u identifikua dhe u ndalua shtetasja: M. K., 37 vjeçe, banuese në Tiranë. Nag veprimet hetimore dyshohet se kjo shtetase ka tentuar të djegë një farmaci, në rrugën “Luigj Gurakuqi”, duke i hedhur lëndë djegëse, me pretendimin se ilaçet që kishte blerë në këtë farmaci i kishin shkaktuar probleme shëndetësore. Në cilësinë e provës materiale u sekuestruan një bidon me lëndë djegëse dhe një aparat celular. Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
