SHKUP– Presidenti i Maqedonisë së Veriut, Stevo Pendarovski ka reaguar ashpër sa i përket vizitës së kryeministrit të Kosvës Albin Kurti në Tetovë dhe Çair ku Kurti u prit jo me flamurin kombëtar të Kosovës por me atë Kuq e Zi. Po ashtu gjatë vizitës së tij një rrugë në Çair iu ndryshua emri nga “Brigada e dytë sulmuese maqedonase” në “Adem Demaçi“. Pendarovski, ka kërkuar që ligji të merret me organizatorët, pasi ata përhapën ide shoviniste, që ndez urrejtje dhe provokim nacionalisht duke komentuar përdorimin e flamujve “Autochtonus” gjatë këtyre tubimeve.
Stevo Pendarovski: Theksimi i ikonografisë provokuese nacionaliste që promovon ide shoviniste të shteteve të mëdha përfaqëson ndezjen e urrejtjes dhe intolerancës etnike, e cila pa mëdyshje sulmon parimet dhe vlerat themelore të Marrëveshjes Kornizë, si dhe konceptin e Maqedonisë si shtet multietnik. Organizatorët e tubimeve publike në Tetovë dhe Çair duhet të sanksionohen ligjërisht për shkeljen e dispozitave ligjore për përdorimin e flamurit dhe himnit shtetëror dhe flamujve dhe simboleve të komuniteteve, duke i injoruar plotësisht simbolet e shtetit. I bëj thirrje organeve kompetente që sa më parë t’i kryejnë procedurat e parapara. Në këtë kuptim, pres që shërbimet kompetente inspektuese të kontrollojnë nëse është respektuar parimi i shumicës së dyfishtë me rastin e marrjes së vendimit, ku duhet të përfshihen edhe votat e komuniteteve që nuk janë shumicë në atë komunë.
Në lidhje me këtë vizitë ka reaguar dhe Presidenti i Serbisë Aleksandër Vuçiç. Ky i fundit u shpreh se Kurti në Tetovë e Çair promovoi “Shqipërinë e Madhe“.
Aleksandër Vuçiç: Ajo që ndodhi në Maqedoninë e Veriut ishte skandal i skandaleve. Aty u promovua ideja e ‘Shqipërisë së madhe’, u theksuan simbolet e saja dhe Kurti u prezantua si kryeministër i të gjithë shqiptarëve dhe kryeministër i Tetovës, ndër të tjera.
Sipas Vuçiç-it emërtimi i një rruge në Çair me emrin e Adem Demaçit, është “skandaloze”.
Alekdandër Vuçiç: Demaçi është një njeri që kaloi 28 vjet në burg, në kohën e Titos që ishte liberal për atë kohë, si ideologu dhe separatisti më i keq dhe më i madh i ‘Shqipërisë së madhe’. Demaçi ishte mentor dhe idhull i Kurtit.
