TIRANË– Kryetari i Partisë Demokratike Sali Berisha ka komentuar këtë të premte vizitën e të dërguarit të Posaçëm të SHBA-së për Ballkanin Perëndimor Gabriel Escobar në Tiranë dhe takimin e tij me kryeministrin Edi Rama. Gjatë fjalës së tij në konferencën e përjavshme me gazetarët Berisha tha se vizita e tij nuk kishte të bënte me zgjedhjet lokale por me dosjen e ish-agjentit të FBI-së Charles McGoinigal dhe përfshirjen e Ramës në këto hetime. Sipas liderit demokrat mesazhi i Escobar në Tiranë ishte “qeli e burgut e hapur” për kreun e qeverisë Edi Rama.
Pyetje: Zyrtari i lartë amerikan pati disa qëndrime ndaj jush, tha që jeni e shkuara, ‘non grata’ nuk hiqet, si dhe dënoi sulmet ndaj Kim, duke thënë se ajo nuk përfaqëson qëndrimet personale, por ato të shefave të saj në Amerikë.
Sali Berisha: Dje deklarova se më pëlqeu vizita, sot ju deklaroj me të njëjtin sinqeritet se më pëlqeu intervista e Escobar. Po pse? Sepse më faktoi që nuk isha i gabuar kur deklarova se më pëlqeu vizita, kur ju thashë shqiptarëve përmes jush se kjo vizitë shtoi një pikë para meje, ekstradimin e Ramës në SHBA. Po ku e gjeta unë këtë? Unë s’e kisha dëgjuar intervistën, atë deduksion e bëra nga takimi i paprecedentë i 32 viteve të karrierës time politike, takim në të cilin nuk u tha asnjë fjalë e vetme, ndoëse vizita u deklarua se ishte për zgjedhjet lokale. Aty nuk u tha asnjë fjalë asnjë gjë. Vetëkuptohet pse ishte kjo vizitë, kryefjala ishte vetëm një. I pyetur për Ramën dhe McGonigal, ai tha ‘nuk komentoj për një çështje penale të hapur’. Kjo do të thotë derë burgu e hapur. Ai nuk tha ‘nuk diskutoj për McGonigal se ka dosje’, tha nuk diskutoj për dosjen. Kjo do të thotë që ishte një derë qelie e hapur për Ramën. Kjo ishte e vërteta ndaj dhe Edi Rama nxinte bashkë me ministreshat e tij me lopatë në dorë pas takimit.
