TIRANË– Kryeministri Edi Rama ka reaguar për herë të parë në lidhje me vjedhjen e shtëpisë së ish-zyrtares Alda Klosi, nga pastruesja Rozeta Dobi. Ajo bashkë me të birin vodhën 120 mijë euro. Në një postim në Twitter Rama shkruan se Reforma në Drejtësi dhe forcimi i institucioneve ligjzbatuese bëhen pikërisht për të pastruar ‘llumin’, duke iu referua Klosit. Sipas kreut të qeverisë sot mburoja politike për zyrtarët e ish-zyrtarët ka rënë.
POSTIMI I RAMËS:
Nuk e di kur do ta kuptojnë disa që Reforma në Drejtësi dhe forcimi i institucioneve ligjzbatuese bëhen pikërisht për të pastruar llumin! Prandaj kur del llumi falë punës së këtyre institucioneve, s’duhet harruar se këto janë provat e vullnetit tonë kundër korrupsionit! E thënë ndryshe, në një kohë tjetër policia apo drejtësia nuk ia nxirrnin kurrë lakrat në shesh njerëzve të veshur me kostum zyrtar, ndërsa sot kohët ndryshojnë përditë për mirë edhe në këtë drejtim! Sepse sot vullneti politik është i plotë dhe mburoja e vjetër politike ka rënë! Unë uroj vetëm që t’u shkohet sa më shumë deri në fund historive të ulëta me para të pista dhe forca e ligjit të mos ndalojë përpara askujt, kur faktet provojnë se është shkelur ligji për përfitime të paligjshme, nga kushdoqoftë.
Vjedhja ka ndodhur më datë 15 dhjetor kur në shtëpi nuk ndodhej askush. Rozeta Dobi punonte si pastruese në shtëpinë e ish-zyrtares së lartë në Kryeministri. Paratë janë vjedhur në kohë të ndryshme. Pasi kishin kryer grabitjen e fundit Dobi dhe i biri Havier Dobi e kthyen shtëpinë “përmbys” për ta bërë të dukej si grabitje. Pas kontrollit në shtëpi atyre iu gjetën dhe 404 mijë dollarë të tjerë, mijëra euro dhe bizhuteri, të cilat ishin fshehur në tubin e aspirimit. Rozeta e Havier Dobi e pranuan krimin para uniformave blu. Havieri me paratë e vjedhura kishte blerë makina luksi, të cilat i ekspozonte në rrjetet sociale.
