TIRANË- Qeveria ka marrë në bazë sugjerimet e dhëna nga FMN për rritjen e rolit të ministrisë së Financave në investimet strategjike dhe PPP-të duke shtuar kompetencat e saj në monitorim dhe menaxhim të këtyre projekteve për vitin 2023 e në vijim.
Në programin e Reformave Ekonomike 2023-2025, MFE tregon se është parashikuar që për projektet që janë mbi një vlerë të caktuar të miratuar nga ministri i Financave, të miratohen vetëm ato që cilësohen si me rëndësi kombëtare për zhvillimin ekonomik dhe social, pavarësisht nga burimi i financimit të tyre. Projektet primare miratohen me VKM në përputhje me hapësirën fiskale.
Ministria thekson në dokument se është miratuar një VKM për menaxhimin e investimeve Strategjike Publike që do të përcaktojë kuadrin rregullator dhe metodologjik për përgatitjen, miratimin, përditësimin, monitorimin dhe zbatimin e procedurave.
Aty thuhet se për projektet që kalojnë vlerën kufi do të jenë të detyruara të dërgojnë dhe projekte fizibiliteti në MFE, me 15 kapituj, që shtohet në vendim si aneks, ku duhet të përfshihet dhe analiza kosto-përfitim nga kompanitë.
Për projektet me rëndësi kombëtare përpos 3 parimeve të rëndësisë, ekonomisë dhe menaxhimit do të ketë dhe 3 parime të shtuara, si; parimi i vlerësimit mjedisor dhe impaktit klimaterik, parimi i vlerësimit të qëndrueshmërisë dhe parimi i vlerësimit gjinor.
Në nivel projekti do të raportohet edhe për treguesit e performancës, informacione mbi realizimin e procedurave të prokurimit, informacioni mbi rastet e krijimit të detyrimeve të prapambetura të argumentuara, problematikat e krijuara në realizimin e projekteve, argumentimet në rastet e parealizuara duke i dhënë një rol më të rëndësishëm Ministrisë së Financave dhe Ekonomisë mbi monitorimin dhe zgjidhjen e problemeve mbi projektet e investimeve etj.
Në dokument përmendet se projektet strategjike do të vijojnë edhe në vitet pasardhëse. Ndërkohë në komisionet ndërparlamentare janë ende në shqyrtim dy propozimet e deputetes së PD-së, Jorida Tabaku, ku kërkohet shtrëngim i kushteve për koncesionarët dhe rritje të transparencës. Sipas deputetes së PD-së, investimet strategjike duhet të ndalohen më 1 janar 2023 dhe çdo propozim i ardhur pas asaj date të mos pranohet./GazetaSi
