Ish-presidenti amerikan Donald Trump konfirmoi të dielën se nuk do të marrë pjesë në debatin e parë televiziv presidencial republikan, i cili është planifikuar për të mërkurën.
“Publiku e di se kush jam dhe çfarë Presidence të suksesshme kam pasur”, postoi Trump në Truth Social, një platformë e mediave sociale që ai bashkëthemeloi.
“Prandaj nuk do t’i bëj debatet,” shtoi ai ndërsa përmendi epërsinë e tij në sondazhet e opinionit si dëshmi e popullaritetit të tij midis votuesve republikanë përpara zgjedhjeve presidenciale të 2024 .
Mungesa e Trump në debatet kryesore të partisë tashmë ishte spekuluar. Për muaj të tërë, ai kishte thënë në mënyrë të përsëritur se shihte pak vlerë në dhënien e një shans për rivalët e partisë së tij – të cilët do të mblidhen për herë të parë në Milwaukee të mërkurën – për ta sulmuar atë duke pasur parasysh epërsinë e tij në sondazhe.
Çfarë mund të thotë mungesa e Trump në debate?
Një sondazh i CBS të dielën tregoi se Trump ishte kandidati i preferuar për 62% të votuesve republikanë, duke mposhtur rivalin e tij më të afërt, Guvernatorin e Floridës Ron DeSantis mori 16% mbështetje. Republikanët e tjerë në garë kishin secili më pak se 10% mbështetje.
Kryesimi i konsiderueshëm i Trump në sondazhe sugjeron se ish-manjati i pasurive të paluajtshme është ende i popullarizuar në bazën e Partisë Republikane, pavarësisht se tani është paditur katër herë.
DeSantis, ish-zëvendëspresidenti amerikan, Mike Pence dhe ish-guvernatorja e Karolinës së Jugut, Nikki Haley pritet të marrin pjesë në debat. Mungesa e Trump në debatin e kësaj jave mund të lejojë rivalët e tij si DeSantis të fitojnë terren.
Kandidatë të tjerë në debat, si ish-guvernatori i Nju Xhersit, Chris Christie, mund të sulmojnë Trump pamëshirshëm gjatë gjithë ngjarjes, me ish-presidentin që nuk mund të mbrohet në kohë reale pasi nuk është në skenë./ VOA
