Vodhi 9 mln lekë në “Exchange”-in ku ishte e punësuar, në pranga 34-vjeçarja

Një 34-vjeçare është vënë në pranga pasi ka vjedhur një shumë të konsiderueshme parash në subjektin ku ishte e punësuar, ndërsa është shpallur në kërkim bashkëpunëtori i saj.

Specialistët për Hetimin e Krimeve në Komisariatin e Policisë Nr. 2, bazuar në informacionet e marra në rrugë operative, kanë organizuar dhe finalizuar operacionin policor të koduar “Valuta”.

Si rezultat i këtij operacioni u bë ndalimi i shtetases B. Sh., 34 vjeçe, banuese në Tiranë, për veprën penale “Vjedhja”, kryer në bashkëpunim. Gjithashtu, u shpall në kërkim shtetasi Y. K., 42 vjeç, banues në Fier.

Shtetasja B. Sh. ishte e punësuar në një subjekt këmbimi valutor, në pronësi të shtetases D. K. Nga verifikimet e kryera ka rezultuar se gjatë javës së fundit të muajit korrik, kjo shtetase, në bashkëpunim me shtetasin Y. K., ka vjedhur 900.000 lekë të rinj, në këtë subjekt.

Punohet për kapjen e shtetasit Y. K. Materialet i kaluan Prokurorisë, për veprime të mëtejshme procedurale.