TIRANË– Prokuroria e Posaçme Kundër Korrupsionit dhe Krimit të Organizuar (SPAK) ka dhënë këtë të martë pretencën për Xhuliano Hoxhën dhe Euglen Halilin, të cilët akuzohen për vrasjen e Emiljano Ramazanit dhe Regis Runajt në verën e vitit 2022 në Elbasan. Raportohet se për Hoxhën Prokuroria e Posaçme ka kërkuar 30 vite burg, ndërsa për bashkëpunëtorin e drejtësisë, Euglen Halilin 12 vite.
Sipas SPAK, vrasjet janë porositur nga Erjon Alibej, çështja ndaj të cilit u veçua pasi dyshohet si i përfshirë në ngjarje të tjera. Për vrasjen e Runajt, Euglen Halilaj dhe Xhuliano Hoxha, akuzohen nga Prokurira e Posaçme (SPAK) si ekzekutor të 26-vjeçarit. Ndërsa për vrasjen e Emiljano Ramazanit akuzohen si bashkëpunetor dhe grup kriminal.
Ndërkohë një rrëfim prekës dhe të dhimbshëm ka pasur para togave të zeza babai i Regis Runajt, 26-vjeçarit që u ekzekutua me 27 goditje thike në trup nga të akuzuarit. Ai kërkoi drejtësi si dhe tha se shpreson që ata të dy të dënohen sipas ligjit që dhe shpirti i djalit të tij të gjejë paqe. Ai ka treguar momentin e vështirë që ai dhe bashkëshhortja po kalojnë pas ngjarjes së rëndë. Ai ka treguar se bashkëshortja vuan nga depresioni dhe shumë sëmundje të tjera.
“Detyrohem ta kyç brenda një dhome se i druhem ndonjë rreziku“, ka deklaruar ai teksa shtoi se tashmë nuk ka mundësi që ta përqafojë të birin ashtu si shumë prindër të tjerë dhe prindërit e autorëve. Me të njëjten frazë u është drejtuar dhe gjyqtarëve në sallë dhe prokurorëve duke u thënë se fatmirësisht ata kanë mundësi që ti përqafojnë fëmijët ndërsa ai pret që djali ti kërkojë lekë për cigare por që ai tashmë nuk kthehet më.
Dëshmia: Ne jeni fukarenj, jemi njerëz të këputur. Dua drejtesi për vrasjen e djalit. Gruaja ime është e sëmurë, shpesh e mbyll në dhomë, se kam frikë mos i ndodh diçka. Djalin ma vranë me 27 thika, u them këtyre çunave; mua vetëm një thikë më duhet, që të shkoj tek im bir. Dua që këta dy çunat të marrin atë që meritojnë asnjë ditë më shumë. Çdo ditë rri në shkallë dhe pres djalin, por ai nuk vjen. Me kuptoni dhe mua, ju gjyqtar dhe prokuror, i përqafoni fëmijët tuaj. Unë pres që djali të më kërkojë lekë për cigare.
