TIRANË– Detaje të reja kanë dalë në dritë nga vrasja e 31-vjeçarit Visar Cengu nga Kukësi. Kështu sipas dëshmitarëve që ishin ulur në tavolinë me viktimën Visart Cengun, si dhe me të plagosurit Rufgen Shehun dhe Arben Basha, pohojnë se i riu nga Kukësi u vra nga “Kobra”, Dibran Hoxhaj për një birrë. Detajet i ka treguar një familjar i dy të rinjve që mbijetuan nga plumbat e “Kobrës”. Për ‘5pyetjet.al’ ai tregoi të gjithë kronologjinë e ngjarjes së rëndë, bazuar te rrëfimi i djemve.
‘Janë zënë për një faturë 100 Euro. Këta (tre djemtë) thoshin janë shumë. Këtu ka nisur sherri. Janë rrahur dhe ai “Kobra” doli pabesisht dhe i qëlloi. Ata nuk kanë qëndruar në lokalin “Kobra” për darkë, por pasi janë kthyer nga darka në një tjetër lokal kanë kaluar aty dhe kanë ndaluar për të pirë një birrë. E pimë, s’e pimë ndonjë birrë, kot këmbëngulën. Qëndruan vetëm 5 minuta. Janë ngatërruar për faturën në fund. Janë zënë brenda dhe dolën për të ikur. Më pas ai (Kobra) i qëlloi pabesisht në momentin që po iknin. Përplasja ishte me personelin më pas “Kobra” i qëlloi te parkingu kur po iknin. Mbyllën dyert e makinës dhe tentuan të iknin, ai i ndoqi dhe i qëlloi. Nuk kanë pasur asnjë konflikt tjetër”, tha familjari i dy personave që arritën që të shpëtonin.
Visar Cengu u ekzekutua me armë zjarri nga Dibran Hoxha i njohur si “Kobra” në orët e para të mëngjesit të 3 janarit. Shkak për këtë konflikt që degjeneroi në përdorimin e armëve dyshohet të jetë bërë një faturë prej 400 eurosh që viktima ka refuzuar ta paguajë. Menjëherë pas ngjarjes “Kobra” ka fshirë kamerat e sigurisë në lokal dhe ka fshehur armën duke mos i lënë asgjë në dorë policisë për momentin. Ndërkohë familjarët e viktimës kërkojnë drejtësi pasi në të kundërt shprehen ata do e marrin vetë drejtësinë në dorë duke paralajmëruar kështu hakmarrje.
