TIRANË– Ish-deputetja e LSI Nora Malaj tha në emisionin “Stay Tuned” se çdo ditë duhet të protestohet për të drejtat e grave dhe jo vetëm në 8 mars.
Malaj theksoi se djemtë duhet të edukohen që të mos kenë turp të dhurojnë lule për partneret, ndërsa shtoi se përpos luleve duhet t’u dhurojmë grave edhe vende pune.
Teksa foli për vrasjen e grave, ajo vuri në dukje se në Shqipëri shteti ka dështuar dhe familja ka pësuar deformacion dhe është në rrezik.
“Kam kuptuar që 7 dhe 8 marsi ka kaluar në Shqipëri midis disa valëve, valës së protestës, valës së festës, valës së urimit, valës së bekimit, valës së dashurisë, valës së dhimbjes. Ishte një puzzle i plotë, që tregon se shoqëria duhet ta ketë vëmendjen çdo ditë për gruan. Pse jo një kolegia ime tha, në 8 mars pse të mos festojmë sot, se çdo ditë duhet të protestojmë, dhe jo një ditë të protestojmë dhe çdo ditë të bëjmë sikur nuk ezkistojnë gratë. Mendoj që gratë shqiptare janë bashkë, edhe nëse janë në skalione të ndryshme, në kuptimin e qasjes ose të formimit. Thellë në subkoshiencë të gjitha e kuptojnë që 8 marsi është ditë reflektimi e plotë, edhe për ato gra që kanë arritur karrierën, edhe për ato gra që nuk kanë arritur të shpërfaqen në vlerën e nevojshme që kërkon shoqëria. Është bukur të jesh grua, të jesh vajzë, është shumë vlerë të edukohesh nga një nënë e mirë që të armatos me armët e sigurta të sfidave që ti do përballosh. Por shumë bukur që të jesh pjesa e mirë e partnerit, njeriut që t’i e bën të ndihesh burrë, sepse një burrë realizohet i plotë kur ka një grua në krah, edhe një grua realizohet e plotë kur ka një burrë në krah. Është mirë që në 5 stinët e ciklit të jetës, si simfonia e Vivaldit, ti të krijosh rritjen tende, të sfidosh, edhe nëse pëson zhgënjime të kesh forcë për ta gjetur, forcën e argumentit, edhe nëse bën gabime, të kesh mundësi që ato të kthehen në akte pozitiviteti. Në ditët e sotme roli i familjes merr një vlerë shumë të madhe dhe të jashtëzakonshme, pasi shoqëria po rend drejt sfidave për t’u mbyllur në vetveteve, për ta kthyer qenien njerëzore në robotike, sepse i tillë është globalizmi. Pas 8 marsit duhet të mos rreshtim së foluri, së mos lodhur së thëni. Për ta bërë shoqërinë më të mirë, sepse kur gruaja është mirë edhe shoqëria është mirë.Mendoj që jo vetëm në 8 mars, por edhe në 9 apo 10 mars mund të vazhdojnë protestat, nëse themi që gruaja është e paralizuar. Jemi në një moment që unë do doja që ky 8 mars të merrte një tjetër konotacion. Së bashku me lulet të dhurojmë edhe vende për të punësuar më shumë gratë. Familja bëhet më e bukur kur dhurohen lule dhe të mos kemi turp nga dhurimi i lules. Por t’i edukojmë djemtë që të dhurojnë lule dhe mbështetje dhe partneritet për vajzat dhe gratë”.
Ndërsa u ndal te ngjarja e rëndë e vrasjes së tre grave nga autori Dan Hutra, Malaj tgha shoqëria mund ta kishte parandaluar këtë krim.
“Shoqëria mund ta kishte parandaluar këtë ngjarje, duke patur parasysh që kufizimi i lirisë duhet të ishte kthyer në një vend ku studiohen këto raste dhe sidomos raste, sidomos raste të këtyre karakteropatëve, që kanë ndryshime hormomale, dezikulibra në të menduar, që nuk lëviz më koshienca, ku njeriu kthehet në kafshë dhe s’ka veprime sociale. Kjo duhet kthyer në një kryefjalë të sistemit. Statistikat e sotme na tregojnë që një në dy vetë sot vuan nga shëndeti mental, dhe një në 6 vjet, adoleshentët janë në ndryshime hormale që shkojnë deri në vetëvrasje. Janë shifra tronditëse për një shoqëri kaq të brishtë që s’ka sistemin e rregullave, ku për fat të keq shteti ka dështuar. Pas 32 vitesh është e tmerrshme që fillojmë nga viti zero. Ka pësuar një deformacion të jashtëzakonshëm familja, që është në rrezik. Individi është i pamotivuar. Kemi ngritur modelin e të fortëve që sot janë rrezik i shoqërisë. Sistemi është si një kështjellë rëre, jo i sigurte. Pasiguria në ekzistencë e çon shoqërinë një kaos. Për t’u fuqizuar një grua duhet që të ketë fuqizimin ekonomik, e para të ketë shkollimin e mirë”.
