TIRANË– Është zhvilluar ditën e sotme seanca gjyqësore në Gjykatën e Posaçme Kundër Korrupsionit dhe Krimit të Organizuar ndaj Ilir Selmanit dhe Elvis Goçaj, të cilët SPAK i akuzon si të përfshirë në vrasjen e ish-policit Santiago Malko në Tiranë. Sipas Prokurorisë së Posaçme Kundër Korrupsionit dhe Krimit të Organizuar të dy kanë lëvizur në vendin e ngjarjes para se të ndodhte atentati mafioz. Ditën e sotme në seancë janë shfaqur dhe pamjet filmike nga atentati mafioz. Të pranishëm në sallë kanë qenë familjarët e të ndjerit, nëna e të cilit ka shpërthyer në lot në momentin që pa ekzekutimin e të birit.
Pamja që lidhet direkt me ngjarjen, është pamja e një kamere sigurie e një lavazhi në rrugën “Xhanfize Keko” ku makina e autorëve të dyshuar vjen dhe ndalon te dera e lavazhit. Pret pak sekonda dhe në momentin kur vjen Santjago Malko e qëllojnë me breshëri kallashnikovi, makina ikën për disa sekonda për inerci dhe përplaset me disa kazanë. Sipas prokurorisë, Malko është qëlluar nga brenda makinës, shkruan Balkanweb.
Sipas dosjes hetimore, ekzekutor dyshohet të jetë Fatmir Hyseni nga Vlora, i njohur si “Doxha”. Ndërkohë që akuzohen si organizatorë vëllezërit, Leonard dhe Elvis Duka. Vëllezërit Duka dhe Fatmir Hyseni janë duke u gjykuar në një proces tjetër. Ndërkohë është dënuar Blendi Teta dhe janë në proces Ilir Selmanit dhe Elvis Gacaj. Gjatë kohës së procesit që pa kamerat e sigurisë ishte dhe nëna e Santiago Malkos, e cila gjatë shfaqjes së momentit të vrasjes së të birit shpërtheu në lot.
