GREQI– Detaje të reja kanë dalë mbi ngjarjen e mbrëmjes së të martes në Greqi, ku disa shtetas shqiptarë u përfshinë në vrasjen e 37-vjeçarit Pëllumb Islami, bashkëatdhetar i tyre në Athinë.
Mësohet se shqiptarët nisën të qëllonin me armë zjarri pas një konflikti banal që nisi mes tyre brenda lokalit, ku plumbat kapën Islamin, i cili ndodhej në vendin e gabuar në kohën e gabuar. Pas vrasjes së shqiptarit, Policia zbuloi jashtë kafenesë një mjet tip ‘Jeep’ i përdorur nga shqiptarët, ndërsa pranë vendit të ngjarjes u pa një makinë tjetër luksoze, e llojit ‘Benz’. Efektivët e policisë, të cilët kanë shkuar në vendngjarje që në momentin e parë, kryen kontrollin e plotë të makinave, për të identifikuar autorët.
Policia ka mundur të kontaktojë biznesin nga ku u morën makinat, për të zbuluar emrat e shqiptarëve.
Në vendngjarje janë grumbulluar nëntë gëzhoja nëntë milimetrash. Ndërsa në muret e dyqanit janë gjetur predha të cilat janë dërguar në Departamentin e Hetimit Kriminal, ku aktualisht po kryhen testet balistike për të përcaktuar se sa armë janë përdorur.
Oficerët e Sigurimit të Atikës, nga eksplorimi i zonës, dyshojnë se shtatë personat e shpallur në kërkim kanë shkuar në lokal si dy grupe për të diskutuar dhe në një moment ka pasur një mosmarrëveshje të rëndë që ka çuar në shkëmbimin e të shtëna.
