ELBASAN– Është zhvilluar këtë të premte në Gjykatën e Elbasanit seanca ndaj Arbër Paplekajt, i cili akuzohetpër vrasjen e Pjerin Xhuvanit katër ditë para zgjedhjeve të përgjithshme parlamentare të vitit 2021. Gjatë seancës së sotme, Paplekaj ka deklaruar se nuk donte të vriste njeri, por po mbronte veten e tij. Sipas tij ai nuk kishte rrugë tjetër përveçse të kryente aktin e rëndë që do të “përgjakte” fushatën zgjedhore.
Arbër Papleka: Kam kaluar testin e integritetit nga agjencitë amerikane kur jam dërguar ne Afganistan. Jam dekoruar nga kryeministri për luftën e antiterrorist. Kam qenë 10 vjet me armë në brez. 10 vjet jam përplasur me grupe kriminale dhe kurrë s’e kam përdorur. Pasi më shajtën, më dhunuan dhe më qëlluan shokun me plumb më thoni ç’duhet të beja? Nuk pata rrugë tjetër. Nuk desha me e vra atë djalë. Nuk gëzova me e vra atë djalë. Mbrojta jetën teme. U përballa me instiktet. Jam ish anëtar i forcave speciale. Dhe instikti i parë për të cilin jam stërvitur është të reagoj kur rrezikohet jeta ime apo e dikujt. Në momentin që sheh armën reagon. E njihni teorinë e qenve të Pavollovit? S’kam vepruar me zemër. Kam qenë makineri. Kam reaguar si jam stërvitur për dhjetëra vite.
