TIRANË– Ministrja e Arsimit dhe Sportit Evis Kushi ka reaguar pas ngjarjes së rëndë në Gramsh ku një 15-vjeçar u vra me thikë nga bashkëmoshatari. Kushi u shpreh ngushëllimet familjes së viktimës dhe shprehet e tronditur për ngjarjen. Ndërkohë ministrja sqaron opinionin publik se ngjarja e rëndë nuk ka ndodhur në ambientet e shkokllës.
POSTIMI I KUSHIT:
Jam thellësisht e tronditur nga ngjarja e ndodhur sot në Gramsh, ku një adoleshent ka humbur jetën si pasojë e një konflikti me bashkëmoshatarët e tij. Pavarësisht se kjo ngjarje ka ndodhur në rrugë, jashtë mjediseve të shkollës, institucionet tona arsimore, së bashku me institucionet e tjera ligjzbatuese, prindërit dhe familjet, duhet të forcojmë më shumë bashkëpunimin për të luftuar fenomenet negative tek fëmijët dhe të rinjtë, të cilat çojnë në ngjarje të tilla të rënda. Një nga prioritetet në sistemin tonë arsimor është forcimi i sigurisë në shkolla, për të cilën punojmë fort duke rritur nga viti në vit numrin e punonjësve të shërbimit psiko-social dhe oficerëve të sigurisë, si dhe duke i trajnuar ata dhe mësuesit në mënyrë të vazhdueshme. Megjithatë, ne duhet të reflektojmë të gjithë si shoqëri që të rrisim vigjilencën për të parandaluar, identifikuar dhe menaxhuar raste të konfliktit në shkollë, familje dhe kudo tjetër. Shpreh ngushëllimet më të ndjera për familjen e adoleshentit, duke shpresuar që të mos kemi kurrë më ngjarje të tilla.
Ngjarja e rëndë që tronditi Gramshin u regjistrua mesditën e kësaj të marte. Fatjon Bici, 15 vjeç u vra me thikë nga bashkëmoshatari i tij pas një konflikti që kishte nisur në rrjetet sociale. I mituri vdiq në duart e mjekëve pasi nuk arriti ti mbijetojë plagës së marrë në zemër. Në ngjarje mbeti i plagosur dhe kushëriri i tij. Autori i ngjarjes dhe tre shokët e tij u kishin zënë pritë Bicit dhe kushëririt ku dhe ndodhi konfortimi fizik.
