LEZHË– Detaje të reja janë zbardhur nga ekzekutimi me shtatë plumba në trup e kokë i biznesmenit Ardian Nikulaj në Shëngjin disa ditë më parë brenda ambienteve të lokalit të tij dhe përfshirjen e mundshme në ngjarje të një shtetasi anglez. “Ora News” shkruan se anglezi ka ndërruar dy taksi nga Shëngjini drejt aeroportit në Rinas.
Ai ka qëndruar i vetëm në hotel dhe ka lëvizur rreth zonës së Nikulajt, ku në disa pamje filmike dallohet dukshëm duke luajtur bilardo. Pas vrasjes së biznesmit, ai është larguar nga shpejtësi nga vendi por sipas policisë kjo mund të ketë ndodhur pasi ai mund të jetë trembur nga ngjarja e rëndë.
Të parën taksi e ka marë në zonën e Shëngjinit me të cilën ka udhëtuar deri në Fushë-Krujë. Këtu ka lënë këtë taksi, duke rimarë një taksi të dytë dhe me të është larguar në drejtim të Rinasit, ku shfaqet në kamerat e aeroportit duke bërë chekinin dhe larguar në drejtim të Anglisë.
Për llogari të hetimit, prokuroria ka kërkuar permes oficerëve të kontaktit që të ndalohet dhe pyetet ky shtetas anglez, mbi qëllimin e vizitës disa ditore në zonën e Shëngjinit dhe largimit të tij të menjëhershëm, pas vrasjes së biznesmenit Ardjan Nikulaj.
