SHKODËR– Është zbardhur dëshmia e Lekë Vuksanit, autorit të vrasjes së Petrit Vuksanit pak ditë më parë brenda banesës së këtij të fundit në Shkodër. Raportohet se para hetuesve ai ka deklaruar se kishte marrë me qira shtëpinë e viktimës dhe se muajt e fundit kanë pasur debate të vazdueshme për pagesën e qirasë dhe ato të ujit dhe dritave.
Më tej thotë Lekë Vuksani se me viktimën është njohur pasi janë nga Dukagjini. Automatikun thotë se e ka gjetur në shtëpinë e viktimës, në debat e sipër e ka marrë duke ekzekutuar 51-vjeçarin, i cili gjeti vdekjen e menjëhershme si pasojë e plagëve të plumbave që vërshuan drejt tij. Pas ngjarjes ai u arratis duke u kapur më vonë nga Policia e Shkodrës e mbështetur nga Forcat RENEA.
Dëshmia e Lekë Vuksanit: Me Petritin jemi njohur sepse edhe ai është nga Dukagjini. I kam marrë shtëpinë me qira duke qenë se ndodhej në Angli. Muajt e fundit kemi patur disa debate për qiranë e shtëpisë, por edhe për pagesat e ujit dhe të energjisë elektrike. Atë ditë kur ndodhi vrasja, Petriti erdhi dhe më nxori nga shtëpia. Unë u ktheva dhe e gjeta vetëm. Aty kemi debatuar dhe në debat e sipër gjeta një automatik që nuk është i imi, por i Petritit. Në debat e sipër kam marrë armën dhe e kam qëlluar.
