TIRANË– Gjykata Kushtetuese ka rrëzuar këtë martë kërkesën e Albion Alikos, autorit të dyshuar të vrasjes së efektivit Ibrahim Basha në Lazarat në vitin 2015 për të përfituar nga amnistia. Kjo është e disata herë që Aliko kërkon të përfitojë nga amnistë. Ai është dënuar me 15 vite burg.
Efektivi i Forcave RENEA Ibrahim Basha u qëllua me një plumb në kokë më 24 qershor 2015 në hyrje të fshatit të Lazaratit gjatë aksionit për ç’kanabisimin e zonës. RENEA ishte njoftuar për një situatë problematike në Gjirokastër, ku ishin raportuar të shtëna me armë zjarri, rreth orës 05:00 të mëngjesit dhe menjëherë është nisur një grup efektivësh të forcave speciale. Pasi automjeti i RENEA ka hyrë për patrullim në fshat, i është bërë pritë dhe është ndeshur me breshëri armësh. Nga të shtënat efektivi i RENEA, Ibrahim Basha mori një plumb në kokë dhe humbi jetën në vend, ndërsa u plagosën edhe dy kolegë të tij, Jetmir Isaj dhe Perlat Shpati.
