MALIQ– Gjergj Mullalli, 55-vjeçari, i cili vrau me armë zjarri një natë më parë bashkëshorten e tij Luiza Mullalli, 46 vjeçe është vetëvrarë këtë të dielë. Raportohet se ai është gjetur nga Policia gjatë kontrolleve për kapjen e tij. Mullalli u vetëvra me armën e krimit. Prej mbrëmjes së djeshme ai ishte në kërkim nga Policia.
Ngjarja e rëndë tronditi fshatin Zëmblak të Maliqit një natë më parë. Gjergji Mullali, i cili sipas dëshmive të banorëve të zonës ishte njeri me probleme dhe i dhunshëm pas një debati me bashkëshorten e tij me të ciliën ishte në proces divorci e ekzekutoi këtë të fundit me armë zjarri dhe më pas ia hodhi trupin në kanalin e ujërave të zeza. Pas ngjarjes u largua nga vendi i ngjarjes. E ndjera Luiza Mullalli ishte e pajisur dhe me urdhër mbrojtjeje nga Gjykata por ashtu si dhe në raste të tjera, urdhri nuk e mbrojti dot.
