Deputetja e Partisë së Lirisë, Erisa Xhixho, mbajti një fjalim frymëzues gjatë një tryeze të organizuar nga Lidhja Demokratike e Gruas, ku u diskutua roli i grave në politikë. Ajo ndau përvojat dhe sfidat e saj personale si një grua e re që nisi rrugëtimin politik në moshë të hershme.
Xhixho theksoi vështirësitë e të qenit grua në një shoqëri patriarkale, duke përmendur sfidat që gratë përballojnë në jetën personale dhe profesionale. Përmes fjalëve të saj, ajo solli një mesazh mbështetjeje dhe respekti për gratë që angazhohen në politikë. Deputetja u ndal më tej duke vlerësuar progresin e grave shqiptare në arritjen e barazisë dhe fuqizimit të tyre.
FJALA E XHIXHOS:
Unë e kam filluar karrierën politike që në moshën 17-18 vjeçare, shumë e re. E kam nisur në Forumin Rinor të Lëvizjes Socialiste për Integrim, duke drejtuar një forum rinor dhe shpesh flisja për çështjet e rinisë. Kur dëgjoja gratë që flisnin për vështirësitë e tyre, për sa e vështirë është për një grua të merret me politikë, në fakt thoja: “Këto gra vetëm ankohen.”
Momenti kur u bëra nënë e dy fëmijëve, e kuptova realisht sa e vështirë është për një grua të jetojë në Shqipëri, të përballet me sfidat e një realiteti shpesh patriarkal, jo miqësor, dhe të zhvillojë një karrierë në politikë.
Unë e kam thënë gjithmonë: nuk është e lehtë të jesh grua në Shqipëri. Përballesh, sidomos në këto vite, me papunësinë, diskriminimin, çmimet e rritura, largimin e fëmijëve, një kosto shumë të lartë jetese dhe me gjithë këtë pamundësi ekonomike e sociale.
Të jesh grua është vështirë, dhe për mua, çdo grua apo vajzë që merret me politikë meriton respekt. Mbi të gjitha, kur ajo është në opozitë, meriton dyfish respekt në kohët që po flasim.
Së fundmi, padyshim, gratë kanë bërë hapa galopantë në aftësitë, integritetin dhe artikulimin e tyre.
