TIRANË– Detaje të reja kanë dalë në dritë nga ekzekutimi i biznesmenit Edmond Papa në Selitë. Kamerat e sigurisë në zonën ku ndodhi atentati në rrugën “Fadil Bodinaku” kanë qenë dhe “çelësi i suksesit” për policinë që bënë të mundur dhe identifikimin e autorëve. Ndërkohë atentatorët pas ngjarjes mesa duket kanë gabuar duke mos e djegur makinën me të cilin udhëtonin pasditën e ngjarjes. Mbajtja e saj e lehtësoi punën e grupit hetimor dhe sot Albano Velo është para drejtësisë ndërsa bashkëpunëtori i tij është shpallur në kërkim.
Edmond Papa u ekzekutua me 9 plumba brenda një lokali në zonën e Selitës në Tiranë më 16 dhjetor të vitit të shkuarshumë pak metra larg nga shtëpia e të vëllait ku kiishte dhe nënën e sëmurë që e kishte sjellë për ta vizituar. Autorët e kishin ndjekur “këmba këmbës” prej ditësh dhe kishin pritur momentin e duhur për të larë hesapet. Autori hyri qetësisht në lokal dhe qëlloi plot 9 herë në drejtim të tij duke e lënë të rrëzuar në tokë. Pak minuta më pas ai ndërroi jetë. Më pas autori ka dalë nga lokali dhe ka ikur në fund të rrugës ku e ka pritur bashkëpunëtori i tij dhe më pas të dy do të largoheshin pa lënë gjurmë. Kapja e tyre erdhi falë kamerave të sigurisë në zonë të cilat u sekuestruan nga Policia.
