TIRANË– Të tjera detaje kanë dalë në dritë nga dhunimi i mjekes në Spitalin Infektiv në Tiranë. Raportohet se shkak për dhunën ndaj saj të jetë bërë vdekja e vëllait të një prej autorëve të sulmit fizik, i cili ka qenë i shtruar në pavionin e Infektivit në QSUT. Në momentin që mjekja u ka thënë familjarëve lajmin për vdekjen e tij ata kanë shpërthyer menjëherë në dhunë fizike ndaj saj duke i shkaktuar dëmtime të shumta.
Pasi kanë dhunuar doktoreshën ata kanë thyer dyert e dritaret e spitalit. Dhe në momentin e arrestimit ata janë treguar të dhunshëm me efektivët e policisë të cilët i kanë neutralizuar. Në prangat e bluve të Tiranës kanë rënë Igli Spahija dhe Bledar Bali. Ndërsa tre të tjerë konkretisht një 50-vjeçar i identifikuar me inicialet K.S, i cili rezulton me precedentë të mëparshëm kriminal, E. Xh., 47 vjeç dhe A. M., 55 vjeç janë vënë nën hetim.
NJOFTIMI I POLICISË:
Tiranë. Goditën për shkak të detyrës një mjeke, dëmtuan dyert dhe dritaret e spitalit ku ajo punonte, arrestohen në flagrancë 2 shtetas, procedohen penalisht 3 të tjerë. Të arrestuarit nuk iu bindën urdhrave të punonjësve të Policisë, të cilët shkuan në vendin e ngjarjes, për të kryer veprimet procedurale.
Specialistët për Hetimin e Krimeve të Komisariatit të Policisë Nr. 4, pas marrjes së njoftimit se disa shtetas kishin goditur për shkak të detyrës një mjeke dhe kishin dëmtuar ambientet e spitalit ku ajo punonte, kanë organizuar menjëherë punën për identifikimin dhe kapjen e autorëve.
Si rezultat i veprimeve të shpejta nga shërbimet e Policisë, u arrestuan në flagrancë shtetasit I. S., 41 vjeç dhe B. B., 54 vjeç, të dy banues në Tiranë. Gjithashtu, u referuan materialet në Prokurori dhe nisi procedimi penal në gjendje të lirë për shtetasit: K. S., 50 vjeç (me precedent të mëparshëm penal), E. Xh., 47 vjeç dhe A. M., 55 vjeç.
Këta shtetas, rreth orës 02:00 të ditës së sotme, në ambientet e një spitali shtetëror, kanë goditur me grushte, për shkak të detyrës, një mjeke të këtij spitali, me pretendimin për neglizhencë mjekësore ndaj një të afërmi të tyre, që mjekohej në këtë spital, si dhe kanë dëmtuar dyert dhe dritaret e këtij institucioni.
Gjithashtu, këta shtetas nuk iu janë bindur urdhrave të punonjësve të Policisë që shkuan në vendin e ngjarjes, menjëherë pas marrjes së njoftimit për këtë rast. Materialet i kaluan Prokurorisë pranë Gjykatës së Rrethit Gjyqësor Tiranë, për veprat penale “Goditje për shkak detyrës”, “Mosbindja ndaj urdhrit të punonjësit të Policisë së rendit publik” dhe “Shkatërrimi i pronës”, të kryera në bashkëpunim.
