TIRANË– Detaje të reja kanë dalë në dritë nga aksioni i Forcave të Ndërhyrjes së Shpejtë dhe RENEA-s ditën e sotme në Fushë-Kuqe ku u ushtruan kontrolle në shtëpinë e të shumëkërkuarit të drejtësisë Ervis Martinajt dhe dy xhaxhallarëve të tij, Faik dhe Rakip Martinaj. Në njoftimin e Policisë bëhet me dije se pas kontrollit të ushtruar në shtëpinë e Faik Martinajt që është dhe babai i Brilant Martinajt, i cili u ekzekutua pak muaj më parë në mbikalimin e Fushë-Krujës dhe në shtëpinë Rakip Martinajt policia ka zbuluar dy armë, rreth 7 mijë fishekë si dhe 85 predha eksplozive. Po ashtu u gjetën edhe 11 uniforma policie, radio si dhe fenelina.
Aksioni i Forcave të Ndërhyrjes së Shpejtë dhe RENEA-s nisi herët në mëngjes ditën e sotme. Gjatë aksionit të tyre zona e Fushë-Kuqes ku dhe ndodhet banesa e Martinajt u “blindua” ndërkohë që në banesë duket qartësisht se kishte masa të shtuara sigurie. Ajo që ra në sy ishte siguria e lartë në shtëpinë e ‘ish-mbretit’ të lojërave të fatit. E gjithë banesa ishte e rrethuar me mur të lartë dhe me tela me gjemba ndërkohë që në hyrje të vilës kishte dhe një kullë vrojtimi në të cilën qëndronin rojet që mbronin atë dhe familjen e tij.
Që prej 11 gushtit ku dhe u denoncua nga familjarët zhdukja e tij fati i Ervis Martinajt mbetet ende një mister. “Mbreti” i lojërave të fatit u shfaq për herë të fundit në një video më datë 22 shtator ku shihej nën shoqërinë e një vajze dhe ish-efektivi i operacionales, Jeton Lami tashmë i arrestuar, në ambientet e një hoteli në plazhin e Durrësit. Që nga ajo mbrëmje askush nuk di të thotë cili është misteri i zhdukjes së tij. Hetimi për zhdukjen e Martinajt, nisi pas informacionit të marrë nga një burim konfidencial, i cili rrëfente se i shumëkërkuari ishte rrëmbyer dhe vrarë nga kundërshtarët.
