NEWSZONE.AL ka mësuar se 4 oficerë policie të rangut të lartë të Policisë së Shtetit janë vënë nën hetim nga SPAK në lidhje me përgjimet nga aplikacioni SKY.
Nga hetimet e SPAK-ut janë gjetur të dhëna që oficerët e Policisë së Shtetit kanë nxjerrë me porosi të veçantë informacione të rëndësishme nga sistemi TIMS duke i dhënë ndihmë personave të caktuar të grupeve kriminale.
Përgjimet nga aplikacioni SKY kanë tronditur botën e krimit në vend, por edhe uniformat blu, pasi siç edhe po faktohet, mjaft efektivë të Policisë së Shtetit janë përdorues të tij.
Përgjimet që autoritetet franceze nxorën nga aplikacioni SKY muajin e kaluar zbulojnë jo vetëm si funksionon porosia e vrasjeve me pagesë, por edhe se shefat e policisë në Shkodër i shërbenin rregullisht bandave kriminale.
Operacioni i koduar “Metamorfoza” zbardhi rolin e biznesmenit Pëllumb Gjoka i cili në bisedat me Behar Bajrin rezulton se ka porositur disa vrasje me pagesë. Gjoka donte të ekzekutonte Ibrahim Licin, Genc Tafilin, Dorian Dulin dhe Kleant Musabelliun. Këtu del se ishin angazhuar edhe shefa të policisë që përdornin edhe mjetet e shtetit për të përgjuar personat e vënë në shënjestër.
Pëllumb Gjoka është i njohur për influencën e tij në Shkodër, për lidhjet e forta me qeverinë dhe si përfitues i statusit si “investitor strategjik” për biznesin e tij. Ai kontrollonte edhe një pjesë të mirë të drejtuesve të policisë së Shkodrës.
Për operacionin “Metamorfoza” u shpallën 15 vetë në kërkim, por vetëm 6 prej tyre u arestuan nga policia dhe 9 të tjerë arritën të arratisen.
Mes tyre është arrestuar edhe Oltion Bistri ish-shef i operacionales, ndërsa është shpallur në kërkim Ardit Hasanbegaj, për akuzat se i shërbyen bandave kriminale.
/ Newszone
