TIRANË– Është zbardhur dëshmia i ish-kryebashkiakut të Kukësit Safet Gjici para togave të zeza të Gjykatës së Posaçme Kundër Korrupsionit dhe Krimit të Organizuar (GJKKO). Mësohet se Gjici të jetë shprehur se nuk ka shkelur ligjin pasi nuk ka dhënë asnjë projekt ndërsa shtoi se ka rënë në kurthin e atyre që nuk e duan. Sipas ish-kryebashkiakut të Kukësit ai e ka kryer dënimin për atë veprim të turpshëm. Por kjo se ka bindur GJKKO-në. Gjici është lënë në masën e sigurisë “Arrest me burg” ndërsa vajza që shfaqet në video Alma Kaçi është lënë në masën e sigurisë “Arrest shtëpie”. Ky vendim u kundërshtua nga avokatët përkatës.
Safet Gjici: Unë u ndëshkova për veprimin që kam bërë, unë e mora dënimin për gabimin që kam bërë. Nuk ka projekt, nuk kemi parë projekt, nuk kam shkelur ligjin. Rashë në kurthin e atyre që s’më duan, nuk kam kryer shkelje ligjore jam dakord me qëndrimin e avokatit.
Safet Gjici u shfaq në një video-skandal më datë 16 qershor teksa kryente marrëdhënie seksuale me një vajzë në zyrën e tij në Bashkinë e Kukësit. Pas kësaj ai dha dorëheqjen duke pretenduar se i kanë ngritur kurth ndërsa pak orë më vonë ai u shkarkua nga detyra me vendim të Këshillit të Ministrave. Pozitat e Safet Gjicit u rënduan më tej pasi pas aktit seksual ai bisedoi me vajzën për një tender për qentë e rrugës që vajza do ta përfitonte pa u futur në garë. Me sa duket kjo e ka fundosur pozitën e Gjicit që tashmë do të përballet me SPAK. Video-skandali solli reagime të shumta dhe trazoi jetën politike në vend. Ndërkohë zgjedhjet në Bashkinë e Kukësit do të përsëriten.
