KOSOVË– Të tjera detaje kanë dalë në dritë nga vrasja e të riut nga Kukësi në lokalin e natës “Kobra City” në Prizren në pronësi të autorit të ngjarjes Dibran Hoxhaj. Kështu mediat në Koosvë kanë zbardhur dosjen e plotë. Bëhet me dije se e gjithë ngjarja ka nisur brenda lokalit ku Visar Cengu, i cili ishte kthyer nga Franca për festat e fundvitit kishte shkuar të argëtohej me miqtë e tij. Por, në momentin që të rinjve u ka shkuar fatura 400 euro, ata s’kanë pranuar ta paguajnë dhe janë përleshur në stafin.
Më pas janë nisur drejt parkingut, kanë hipur në makinë dhe kanë tentuar të largohen, por Dibran Hoxhaj, i njohur si “Kobra” bashkë me një grup djemsh konkretisht: Kujtim Gashi, Jesmir Badali, Burim Mazreku, Enver Amrullahi (vëllai i Hoxhajt) dhe Arben Vezaj u kanë dalë përpara. Hoxhaj qëlloi në drejtim të mjetit ku ndodheshin tre të rinjtë nga Kukësi, por ata nuk ndaluan. Cengu e miqtë e tij u nisën drejt spitalit të Kukësit, por 31-vjeçari ndërroi jetë rrugës.
Pas ngjarjes, ‘Kobra City’ u rrethua nga forca të shumta policie. Hoxhaj menjëherë nxitoi të fshinte kamerat e sigurisë. Ai ka hedhur edhe armën e përdorur dhe në këtë mënyrë, grupi hetimor nuk ka në dorë prova. Gjithsesi, mbi ‘Kobran’ rëndon vepra penale “vrasje e rëndë”. Ndërsa të ndaluarit e tjerë për “pjesëmarrje në rrahje”. Sot të gjithë kanë dalë në gjyq. Kobra nuk e ka pranuar krimin, por ka shfajësur të vëllanë, Enver Amrullahin, për të cilin është shprehur se nuk ka qenë në vendin e ngjajres, por ka shkuar më vonë.
