TIRANË– Gjykata Kushtetuese pritet që të plotësohet për herë të parë me të gjithë anëtarët e saj që pas procesit të Vetting-ut i nisur në kuadër të Reformës në Drejtësi. Aktualisht Kushtetuesja drejtohet nga Vitore Tusha, së cilës i ka mbaruar mandati që në vitin 2017. Gjykata e Lartë ka njoftuar sot mbledhjen e Posaçme për zëvendësimin e Tushës. Mbledhja do të zhvillohet të hënën e 16 janarit ora 9:30.
NJOFTIMI:
Zëvendëskryetari i Gjykatës së Lartë, z. Sokol Sadushi, në zbatim të detyrimeve ligjore që burojnë nga pika 3 e nenit 7/ç të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë” (i ndryshuar), nenit 4 të Rregullores së Mbledhjes së Posaçme të gjyqtarëve të Gjykatës së Lartë për zgjedhjen e anëtarit të Gjykatës Kushtetuese, si dhe të nenit 26, pika 2 të ligjit nr. 98/2018 “Për organizimin e pushtetit gjyqësor në Republikën e Shqipërisë”, ka vendosur thirrjen e Mbledhjes së Posaçme të gjyqtarëve të Gjykatës së Lartë, për të zgjedhur anëtarin e Gjykatës Kushtetuese, ditën e hënë, datë 16.01.2023, ora 09.30.
Dy kandidatët për në Kushtetuese janë Elsa Miha dhe Holta Zaçaj. Fakti që janë vetëm dy kandidatë krijon një ngërç pasi duhen 3 të tillë për të plotësuar kriteret ligjore dhe kushtetuese që Mbledhja e Posaccme e Gjykatës së Lartë të mund të votojë. Kjo është hera e pestë që rihapet thirrja për kandidatët dhe kanë munguar aplikimet pasi shumë pak plotësojnë kriteret.
