TIRANË– Pak minuta pasi Presidenti Bajram Begaj dekretoi datën 24 shtator 2023 si ditën kur do të mbahen zgjedhjet e pjesshme për krye bashkiak të Kukësit ka ardhur dhe reagimi nga Partia Demokratike. Gjatë konferencës së përjavshme për mediat Berisha tha se PD po diskuton emrin e kandidatit duke lënë të kuptohet se ish-kandidati i tyre përballë Safet Gjicit, Admir Sinamati mund të mos jetë më i zgjedhuri i demokratëve.
Sali Berisha: Do kemi kandidat pro ende se kemi përcaktuar, do diskutohet dhe vendoset.
Po ashtu Berisha u ndal dhe tek situata brenda Partisë Demokratike. Sa i përket votëbesimit të tij në Këshillin Kombëtar të PD pas humbjes në zgjedhjet e 14 majit , lideri demokrat nuk dhe një datë se kur do të ndodhë por la të kuptohet se me shumë mundësi kjo do të ndodhë në shtator dhe jo më herët.
Sali Berisha: Do të ndodhë. Kjo është e pashmangshme. Është ligj absolut.
