Partia Demokratike zgjedh sot kryetarin e ri. Demokratët u janë drejtuar qendrave të votimit, sipas degëve të PD-së, që prej orës 8:00, deri në 19:00. Në këtë proces garojnë dy kandidatë, ish-kryedemokrati Lulzim Basha dhe Gjergj Hani, ish-i përndjekur politik. Basha u paraqit pranë zyrave të degës 8 në Tiranë, për të votuar ku më pas dha një deklaratë për mediat :
“Shpreh mirënjohjen për mijëra demokratike që iu janë drejtuar kutive të votimit në këtë ditë me domethënie të veçantë dhe për nga rrethanat unike për PD-në. Unike sepse jemi përballur me sfida si askush.
Sepse ata mijëra demokratët që sot i drejtohen kutive të votimit kanë përballuar sulme nga më të padenjat e më të pamerituarat, padrejtësi të mëdha.
Por ata vazhdojnë të qëndrojnë jo për veten e tyre, jo për fatet e tyre personale por për kauzat dhe vlerat që i bashkojnë në këtë familje politike në shërbim të shqiptarëve.
Kjo dalje masive, që në mëngjes kam marrë mesazhe të pjesëmarrjes së demokratëve në këtë proces të sfiduar, të sprovuar por të vendosur që përmes votës së tyre sot të rinisin një ringritje të PD-së, jo vetëm për demokratët por me dhembshuri për çdo shqiptar, me shpresë tek Shqipëria e besim tek Zoti”, tha Basha.
