TIRANË– Kryetari i Grupit Parlamentar i Partisë Socialiste Taulant Balla ka komentuar ditën e sotme “zhdukjen” nga jeta politike e ish-zëvendëskryeministrit Arben Ahmetaj. Po ashtu ai u ndal dhe tek aksioni i fundit i Policisë në Fushë Krujë ku një i kërkuar i drejtëaisë u gjet në shtëpinë e deputetit socialist Rrahman Rraja. Balla u shpreh se PS nuk do marrë në mbrojtje askënd.
Pyetja: Ku ka humbur kolegu juaj Arben Ahmetaj? Kur do angazhohet ai në zgjedhjet lokale? Ju nuk keni bërë një distancim nga Rrahman Rraja, nipi i së cilit sipas SPAK është i përfshirë në atentatin ndaj prokurorit. A mund të ketë shërbyer kolegu juaj si mburojë e eksponentëve kriminale?
Taulant Balla: Ju e dini që unë kam respekt për detyrën dhe punën e gazetarit. Këtë komunikim publik dua ta mbaj tek kjo dosje, tek 21 janari. Me garancinë më të plotë mirëpres cdo pyetje, një gjë duhet ta dini se PS nuk merr në mbrojtje askënd, nuk është zyrë avokatore e askujt. Bashkë me kolegët e mi dhe me Ramën si kryetar i Partisë e kemi mbrojtur dhe do mbrojmë hetimin për 21 janarin. Për çështje tjetër ju pres që nesër.
