TIRANË– Kryeministri Edi Rama ka përgëzuar këtë të mërkurë Policinë e Shtetit për punën e saj për vënien para përgjegjësisë të piromanëve që shkaktuan zjarret në vend, së fundmi në pyllin me pisha pranë Kishës së Shna Ndout në Laç. Përmes një postimi në rrjetet sociale Rama ka një thirrje për gjyqtarët që sipas tij duhet të heqin dorë nga avazi i vjetër i mosndëshkimit të kësaj veprimtarie kriminale që dënohet deri në 15 vite burg.
REAGIMI:
Një bravo e madhe për Policinë e Shtetit që këtë verë u është qepur këmba-këmbës zjarrvënësve, duke arritur t’i kapë dhe çojë prapa hekurave, si në rastin e kriminelëve që i vunë zjarrin pyllit në Laç, për të cilët përsëris, si për gjithë të arrestuarit e tjerë, apelin në adresë të gjykatësve në rrethe, që të mos vazhdojnë me avazin e tyre të vjetër të mosndëshkimit të një krimi barbar si ky, i cili në Kodin Penal të Republikës së Shqipërisë dënohet deri 15 vjet burg. Një falënderim i përsëritur për trupat e Agjencisë së Mbrojtjes Civile, e cila e ka rritur ndjeshëm nivelin e performancës gjatë këtij sezoni turistik, duke e mbrojtur me profesionalizëm e shpirt sakrifice pasurinë e paçmueshme natyrore dhe ulur në mënyrë të konsiderueshme dëmet potenciale të këtyre krimeve të neveritshme në verbërinë, shpirtligësinë, marrëzinë e tyre.
