TIRANË– Komisioni Qëndror i Zgjedhjeve është mbledhur këtë të hënë për të diskutuar një denoncim se një zyrë elektorale e koalicionit ‘Bashkë Fitojmë’ është ngritur pranë KZAZ-së 37 në Tiranë. Gjatë fjalës së tij Kryekomisioneri Ilirjan Celibashi tha se fillimisht ai doit’ua komunikojë këtë problem përfaqësuesve të koalicionit që ta zgjidhin me mirëkuptim këtë situatë. Ndërkohë nga ana tjetër përfaqësuesi i Partisë së Lirisë në KQZ Altin Kazizaj ka kërkuar nga Celibashi që e njëjta praktikë të përdorej dhe për Partinë Socialiste , e cila sipas tij ka mbushur vendin me materiale propagandistike.
Altin Kaziaj: Mund të shkarkojmë të gjithë vëzhguesit. Nga data 15 si qytetar mund të konstatojmë në rrugët e qytetit të Tiranës dhe në të gjitha rrugët e Shqipërisë billborde të mëdhenj. Vetëm në rrugë dytësore Rinas Tiranë janë mbi 30, me gjuhë fyese, seksiste, bullizuese. Jua kanë raportuar këto juve? E njëjta situatë është në çdo rrugë. Keni këtë pamjen e ‘shpëtimtarit të vendit’ me ngjyra, ndërsa këta të opozitës i ka bërë pa ngjyrë se vetëm gjuhë denigruese di. Për ‘barazi të armëve’ duhet të shikoni se çfarë bëjnë këta të mazhorancës pastaj të merreni me zyrat e ‘Bashkë Fitojmë’. Silluni në mënyrë ligjore.
Ilitrjan Celibashi: Ne kemi vendosur shqyrtimin e denoncimeve të paraqitura nga ana juaj por edhe nga ana e disa organizatave të shoqërisë civile për mënyrën se si PS por edhe subjekte të tjera po e bëjnë këtë fushatë. Por rasti konkret që lidhet me ju është një rast i sjellë më herët. Shqyrtimet e tjera janë në radhë nesër dhe në vazhdim. Nuk ka një qasje të diferencuar për mënyrën se si silleni në fushatë elektorale. Çdo denoncim ka të gjithë vëmendjen tonë.
