Klubi i Bylisit ka mbyllur këtë edicion me rënien në Kategorinë e Parë, pasi nuk ia doli të mbijetonte në Superiore. Skuadra ballshiote do të nisë kështu një projekt të ri, por pa shumë prej lojtarëve që kishte afruar së fundmi për të tentuar qëndrimin në elitë.
Ka qenë vetë klubi mallakastriot që ka bërë të ditur se ka mbyllur marrëveshjet e bashkëpunimit me 13 lojtarë, duke dekretuar fundin e kontratave të tyre dhe largimin nga Bylisi. Një listë me emra të njohur si Zguro, Adili, Damçevski apo dhe Janku i cili është në kontakte me kampionët e Partizanit.
POSTIMI I BYLISIT
Të nderuar sportdashës mallakastriotë, mbyllja e sezonit nuk ishte ajo që donim e që shumë kishim ëndërruar, por ju premtojmë se do të rikthehemi më të fortë!
Nga sot kemi nisur punën për sezonin e ri, ndaj ju bëjmë me dije se: Stivian Janku, Aleksandër Damçevski, Vasil Zhongo, Mevlan Adili, Vangjel Zguro, Joalisson Santos, Kristi Kote, Esquerdinha, Charles Atchimene, Anthony Beji, Tomoiuki Doi, Brice Tutu dhe Abu Danladi nuk janë më pjesë e jona. Klubi ynë i falënderon për kontributin e dhënë dhe iu uron suksese në vijimin e karrierës së tyre!
Së bashku më të fortë, së bashku me Bylisin! PANORAMASPORT.AL
