Drejtuesja e klubit sportiv Tirana Deborah Keçi rrëfeu në emisionin “Stay Tuned” me moderatoren Valbona Mhilli se në fillimet e saj e gjeti klubin me mungesë energjie dhe uniforma lara-lara.
Keçi veçoi si një nga arritjet e punës në 3 vite, rikthimin e tifozerisë së flaktë në Pallatin e Sportit, dhe pajisjen e 16 disiplinave me uniforma.
Gjeta një mungesë energjie në klub. Gjëja tjetër që me jepte bezdi, ishte mungesa e informacionit të njerëzve. Një nga arritjet më të mëdha që ka bërë klubi i Tiranës është që tashmë Pallati i Sportit është mbushur me tifozë të flaktë. Një rivitalizim dhe një rikthim si dikur i tifozerisë në Pallatin e Sportit, sepse është e dhimbshme të shohësh një ndeshje derbi në basketboll, në volejboll pa tifozë. Këto tre vite shohim një interesim të madh publik për të ndjekur skuadrat e zemrës. Besoj që kjo është një fryt i kësaj pune që kemi bërë. Gjëja e parë që më ka dhënë bezdi kur kam shkuar në klub ishte që gjithë ekipet shkonin në kampionat lara-lara, njëri e vishte bluzën portokalli, tjetri jeshile. Unë vet e kam vuajtur shumë kur kam qenë sportiste, kur shkonim jashtë shtetit, ishim i vetmi ekip pa uniforma, kjo të bën të ndihesh inferiore. Gjënë kryesore që kam bërë në klub, është që të gjitha ekipet nga i pari te i fundit, 16 disiplina, i kam veshur me uniforma, dhe në kompeticionet zyrtare shkon me stemën e klubit, ngjyrat bardheblu. Ana vizive për mua është element i rëndësishëm”.
Ajo u shpreh ndër të tjera se beson që ka një kontribut në rikthimin e Tiranës në majën e volejbollit shqiptar pas 18 vitesh.
Po ashtu Keçi tha se ka një interes të shtuar të fëmijëve për sportin e taekwondo.
Ajo u shpreh pas futbollit sporti më masiv dhe i ndjekur është basketbolli i meshkujve.
Drejtuesja e k.s. Tirana tha se duhet punuar më shumë me moshat, duke ngritur shqetësimin se si do të zëvendësohen disa nga sportistët më me emër të Shqipërisë.
Është rritur niveli i sportit në Shqipëri, por duhet punuar shumë me moshat. Sporti ka një moshë të caktuar skadence. Pyetja që mua më shqetëson më shumë është farë ndodh në momentin kur Luiza, Erkandi, Brikeni të tërhiqen nga sporti. A kemi të dytë? Kjo është çështja, dhe kjo fillon nga trajnimi i moshave, evidentimi i talenteve, puna në shkolla”.
