“Ahmetaj u shkarkua që të arratiset”, Berisha: Rama përgjegjës kryesor për aferën, paratë nga fondi i emergjencave!
Kreu i PD-së Sali Berisha ka reaguar lidhur me shkarkimin e Arben Ahmetajt nga posti i zv.kryeministrit, duke e konsideruar këtë një akt për të larë duart me krimin e shëmtuar, aferën e inceneratorëve.
Berisha theksoi se Rama është përgjegjësi kryesor dhe direkt, sepse firmosi kontratën me procedurë të mbyllur.
Sot njoftohet se Edi Rama për të larë duart me krimin e tij të shëmtuar, aferën ndër më të mëdhatë në historinë e vendit, aferat e djegsave, ka shkarkuar nga detyra Arben Ahmetajn. Me këtë rast unë, duke e konsideruar Ahmetajn një nga eksponentët kryesor të mafies së djegësve, shtoj se kreu i kësaj afere është një dhe vetëm një, Edi Rama. Në aferën e inceneratorëve ai ka firmosur siç ka pohuar vet në kundërshtim me ligjin. Edi Rama ka firmosur në mënyrën më të paligjshme kontratën bazuar në procedurën anti-ligjore të negocitave të mbyllura. Edi Rama në shkelje flagrante të ligjit dhe barazisë së tenderave, ka firmosur kontratën një kompanie, e cila kishte zero eksperiencë në fushën e plehrave. Edi Rama është përgjegjësi numër një i vjedhjes monstruoze të shqiptarëve në aferën e djegsave. Për djegësin e Elbasanit dhe Fierit, ministria e Mjedisit që u përdor për ekzekutimin e kësaj vjedhje, kishte në buxhetin e saj zero lekë. Paratë e djegsave u morën nga fondi i Këshillit të Ministrave për urgjencën. Fond që përdoret vetëm në rastin e katastrofave natyrore dhe fatkeqësive të mëdha natyrore. Rama këtë fond e përdori për të përvetësuar, bashkë me zyrtarët e tij, dhjetëra e dhjetëra milionë euro. Me urdhër të tij nga fondi i emergjencës kaloi dhjetëra e dhjetëra milionë euro në buxhetin e Ministrisë së Mjedisit, për vjedhjet me inceneratorët. Rama është përgjegjës direkt sepse ai firmosi kontratën me procedurë të mbyllur, në një kohë kur enti zyrtar i Prokurorimeve Publike, Agjencia e Prokurimeve Publike, me shkresë kishte denoncuar si të paligjshme për prokurim procedurën me negociata të mbyllura”.
Berisha vë në dukje se vjedhja në inceneratorin e Tiranës, sipas KLSH, shkon në 283 milionë euro.
Kurrë një kryeministër, përveçse atij që vendos të vjedhë para me valixhe, nuk firmos një procedurë të tillë. Edi Rama është koka e Meduzës e kësaj afere të tmerrshme. Në rastin e inceneratorit të Tiranës, në shkelje të plotë, ai firmos bonus 8 pikë avantazh për kompaninë që u përdor për të gjitha vjedhjet. Edi Rama ka pranuar se ka firmosur në mënyrë të paligjshme, por ka mohuar se njihte Gugalen, Zoton dhe Mërtirin, në një kohë kur në ligjeratën, apologjinë që i bënte vjedhjes së tij për inceneratorin e Elbasanit, ata ishin më të rëndësishmit në sallë. Pra, ky është Edi Rama në raport me vjedhjen. Duhet të informoj qytetarët se vjedhja në inceneratorin e Tiranës shkon, sipas KLSH, në 283 milionë euro.
Kryedemokrati shtoi se Arben Ahmetaj është strumbullari i megavjedhjes me inceneratorët, ndërsa Zoto, Gugalja dhe Mërtiri tre ushtarë të tij.
Pse Arben Ahmetaj është strumbullari? Ekipi i kësaj megavjedhje ka pasur tre ushtarë: Zoton, Gugalen dhe Mërtirin. Arben Ahmetaj, i pyetur në komisionin parlamentar, paraqiti traumën e tij, por nuk pohoi njohjen me Mërtirin. Unë u them shqiptarëve se ai ka qenë menaxher i kompanisë Hermes, me të cilën Arben Ahmetaj ka vjedhur miliarda impulse, që kapin vlerën e 13 milionë eurove. Arben Ahmetaj pësoi një aksident kur ishte i shoqëruar në Maqedoni me këta mafiozë. Arben Ahmetaj është njeriu që ka firmosur shndërrimin e fondit të emergjencës në fondin për djegësit, jo pak por 55 milionë euro. Ai vërtet nuk ka firmosur në kontratën e djegësit të Tiranës, por ka firmosur në kontratën e projektit të djegësit të Tiranës. Ai u shkarkua vetëm me një qëllim: të shpëtojë lëkurën e Edi Ramës”.
Ndër të tjera, Berisha tha se Rama po e liron Ahmetajn nga detyra vetëm e vetëm që ai të largohet nga Shqipëria.
Me shkarkimin e Arben Ahmetajt, i krijohet mundësia atij për t’u arratisur nga Shqipëria. Arben Ahmetaj, në vitin 2005, është arratisur disa vite në Rumani, ku kërkonte azil. Tani ai e liron nga detyra vetëm e vetëm që ai të largohet. Me këtë rast, unë i them Edi Ramës, se edhe në ata satelitët që ke porositur, të shkojë, do bëhet përgjegjës para shqiptarëve për këtë aferë dhe aferat e tij. Rama është kryeministri më hajdut i 110 viteve të fundit në Shqipëri, kryeministri më hajdut i rajonit dhe Europës. Mund t’i bësh presion dhe t’ia mbyllësh gojën SPAK-ut të partisë, por shqiptarët dhe popullin opozitar, nuk do mundesh kurrë ta trysnish pa të dhënë vendin që meriton si një hajdut i papërmbajtur. E njëjta gjë vlen për Arben Ahmetajn, shko edhe prapa diellit. Por nuk do kesh shpëtim më. Kjo aferë për popullin opozitar është për jetë a vdekje.
