Meta: Rama dhe Basha futën në grackë LSI! Referendumi, si shpata e Demokleut për Esat Pashët e rinj
Ish-Presidenti Ilir Meta, në ditën e parë të largimit nga detyra e kreut të shtetit dha deklaratën e parë për mediat nga selia e partisë së themeluar prej tij, Lëvizja Socialiste për Integrim.
Ai tha për mediat se nuk ka vetëm 24 korrik, por ka edhe 25 korrik, teksa foli për një ditë të re, një agim i ri dhe një rrugë të re.
Me kartën e anëtarësisë së LSI në dorë, ai deklaroi se shkoi në godinën e partisë pasi kishte nostalgji për dokumentin e LSI, edhe sepse tha se është krenar që ka krijuar në vitin 2004 një forcë politike për të shpëtuar integrimin e Shqipërisë që siç tha ai, mbahet peng nga Partia Socialiste.
Sipas tij, edhe prej angazhimit të jashtëzakonshëm të LSI u bë rrotacioni, pasi kleptokracia bllokonte integrimin dhe në vitin 2006, Shqipëria firmosi Marrëveshjen e Stabilizim Asoocimit, të cilën Mali i Zi dhe Serbia e firmosën më pas, duke shtuar se ata i kanë çelur më para negociatat.
Ne në pamundësi për t’i shtyrë negociatat nga regjimi kleptokratik, i hapëm tani dhe shkarkuam kryenegociatorin, duke treguar seriozitetin e procesit, urrejtjen e atyre që urrejnë llogaridhënien, konkurrencën, meritokracinë, pluralizmin politik, median e lirë dhe të pavarur.
Erdha të them se jam krenar për forcën politike që krijova e cila zhbllokoi procesin dhe që jo vetëm i dha vendit stabilitet, por edhe liberalizmin e vizave, falë koalicionit të bërë në vitin 2009 me PD, por që ka meritat e saj të padiskutueshme për marrjen e statusit kandidat dhe rekomandimin për çeljen e negociatave, ka bërë çdo gjë LSI për të përshpejtuar integrimin e vendit.
Por ky nuk ishte vullneti i lidershipit të Partisë Socialiste, por edhe ish-lidershipit të korruptuar dhe kapur prej kohësh të Partisë Demokratike, që në mënyrë të qëllimshme programuan djegien e mandateve dhe kapjen e shtetit në përmasa skandaloze.
Këtë nuk mund ta bënin pa futur në grackë dhe LSI, e cila doli nga funksioni i saj për fat të keq dhe u bë një shtojcë e pavetëdijshme e PD. Basha çdo gjë e kishte të mirëkordinuar dhe mirë programuar me Ramën.
Ka ardhur momenti për një transformim totalisht të sistemit në vend dhe ka ardhur momenti që populli i jashtëzakonshëm i 2 marsit të nisi rrugën e tij, të shumëfishohet ditë pas dite dhe sa më shpejtë të marrë rrugë referendumi, si e vetmja mënyrë për të vendosur nën kontroll këtë klasë të papërgjegjshme politike.
Jam i sigurtë se kjo gjë do të ndodhë shumë shpejt dhe referendumi që i ka munguar popullit të Shqipërisë.
Referendumi do të jetë shpata e Demokleut për Esat Pashët e rinj të këtij vendi që kanë vënë dhe vënë në diskutim sovranitetin e vendit dhe që i ngulin thika pas shpine edhe shtetësisë së Kosovës.
Nëse u bëra President, u bëra prej LSI dhe peshës së saj parlamentare, dhe e kam për detyrë të japë edhe llogaridhënie.
